УИХ дахь АН-ын бү­лэг хаврын чуулганы анх­ны хуралдаанаа хийж, Ерөн­­­хий сайд Н.Алтанхуяг, Монголбанкны ерөнхийлөгч Х.Золжаргал нарын мэдээллийг сонсчээ. Эдийн засагт үүсээд байгаа хүндрэлийг даван туулахад ямар арга хэмжээ авах талаар ярилцсан байна. Одоогийн нөхцөл байдлыг болж өгвөл улс төрийн нө­лөөгүй толинд харахыг АН-ын­хан хичээсэн гэнэ. Өөрөөр хэлбэл, эдийн засаг сүүлийн хэдэн жилд хэрхэн өсч, ямар шалт­гаанаас болж хямарсан талаар тоо баримтад үндэслэн авч үзэх нь улс төрийн нө­лөөгүй толь юм гэж АН-ын бүл­гийн дарга Д.Эрдэнэбат хэллээ.

Тэрээр “2009 онд нэг их наяд төгрөг байсан төсвийн орлого 2012 онд 4.9 их наяд төгрөг болж, 2.5 дахин өссөн.  2012 оноос хойш 2014 оны төлөвлөсөн хэмжээ 2009 оныхтой харьцуулахад  3.6 дахин өссөн. Төсвийн хөрөнгө оруулалт 2009 онд 20 хувийг эзэлдэг байсан бол  2012 онд 34 хувь болж өссөн байдаг. ДНБ 2011-2012 онд 14 их наяд төгрөгт хүрсэн. 2014 онд  20 их наяд төгрөгт хүрэх төсөөлөл гарсан. Гадаад худалдаа 2009 онд нэг их наяд төгрөг, 2012 онд дөрвөн их наяд төгрөг болж өс­сөн байна. Харин нүүрсний үнэ   дэлхийн зах зээлд 2009 онд 32 ам.доллар байсан бол 2011 онд 130 ам.доллар болсон. Харин 2014 онд 35 ам.доллар болох төлөвтэй байгаа” гэсэн юм.

Эдийн засгийн энэ нөхцөл байдалд хэн нэгнээс алдаа, бурууг хайхгүйгээр цааш­даа хэрхэн анхаарахаа ярил­­­­цах ёстойг тэрээр мөн он­цол­­сон. Иймээс Зас­гийн газар, Монголбанк ойрын үед хэрхэн ажиллах чиглэ­лийг бүлгийн хурлаар өг­сөн байна. Монголбанк кон­цессын гэрээгээр хийх ажлуу­дыг анхаарч, тэр дундаа Алтанбулаг-Замын-Үүд хүртэлх транзит авто замыг эхлүүлэх ёстой. Мөн боомтын төмөр замын асуудал, Асгатын мөнгөний ордыг ашиглах та­лаарх гэрээ хэлэлцээрийг ойрын үед шийдэх үүрэг өг­чээ. Ашигт малтмалын тухай хуульд нэмэлт, өөрчлөлт оруу­лах, Оюу толгойн хэлэл­цээрийг түргэвчлэхийг ч ги­шүүд анхааруулжээ. Валю­тын ханшийн тогтвортой байд­лыг хадгалах, үүнд тодорхой чиглэл гаргаж ажиллахыг Мон­голбанкинд үүрэг болгосон байна. Сүүлийн жилүүдэд тө­рөлт нэмэгдэж байгаа тул Засгийн газрыг төсвийн тодотголдоо юуны өмнө төрөх эмнэлгүүдийн барилгыг барих, эхлүүлснийг нь дуусгаж ашиглалтад оруулах ёстойг АН-ынхан хэлжээ. 888 төслийг Жижиг, дунд үйлдвэрлэлийн хэрэгжүүлэхэд зээлийг нь шийдэх чиглэл өгсөн гэнэ. Улмаар зээлийн даатгал, экспортын эрсдэлийн тухай хуулийн төслүүд боловсруулж, батлуулах шаардлагатай гэв.

Харин царцаасан хөрөнгө оруулалтын тухайд ажлын хэсгийн мэдээллийг сонсч, хэд хэдэн чиглэл баримтлахаар болжээ. Тухайлбал, ажлаа эхлүүлээд зогссон, барилгын компани нь олдохгүй байгаа, чанар, стандартгүй барьсан, мөнгөө аваад алга болсон бол хөрөнгө оруулалт хийхгүй. Зарим барилгын зориулалтыг өөрчилж худалдах, хэт өндөр өртөгтэй бол хөрөнгийг нь шийдэхгүй байх санал гар­чээ. Мөн улсын хөрөнгөд хариуцлагагүй хандсан компа­ниудын жагсаалтыг гаргаж, хуулийн байгууллагаар шал­гуулна гэжээ. Төсөвчид гэх үндэслэлгүй мөнгө нэмдэг хүмүүсийг зарлана. Хуулийн байгууллага бурууг нь тогтоогоогүй байхад Аудит, Засгийн газар хэнд хариуцлага тооцохыг ярих ёсгүй гэсэн байр суурьтай байна. Засагт хамтарсан “Шударга ёс” бүлгийн санаачилсан удтал яригдаж буй Өршөөлийн тухай хуулийн төслийг хаврын чуулганы хэлэлцэх асуудлын дараалалд оруулж, батлахыг АН-ын бүлгийнхэн дэмжжээ. Хамтын тэтгэврийн тухай хуулийн дагуу иргэдэд мөнгө олгоход төсвөөс 200 тэрбум төгрөг гарах уу, үгүй юү гэдэгт мэдээлэл өгөв. УИХ дахь АН-ын бүлгийн дэд дарга С.Одонтуяа “Хамтын тэтгэврийн тухай хууль батлагдвал төсөвт 200 тэрбум төгрөгийн дарамт ирнэ гэж МАН-ынхан яриад байгаа. Бид тооцоо судалгаа хийхэд хамгийн ихдээ л 22.8 тэрбум төгрөг гарна. Жилдээ 8694 хүн тэтгэвэр авахаа больдог гэсэн тооцоо бий. Эдгээрийн хэд нь Хамтын тэтгэвэрт хамрагдах нь тодорхойгүй. Гэтэл МАН-ынхан тэр хүмүүсийг маргааш үгүй болгоод мөнгө өгөх гэж байгаа мэтээр ярьж байна. Ямар аргаар бодож 200 тэрбум төгрөг гэж гаргаж ирснийг бид хэдэн янзаар бодоод ч олохгүй байгаа” гэсэн юм.