2014 оны төсөвт 0 дүнтэй царцаасан 243 объектод хийсэн аудитын дүгнэлтийг өчигдөр үдээс өмнөх чуул­ганы хуралдаанаар хэлэлц­сэн. Гишүүд Төвсийн байнгын хорооны дарга Ц.Даваасүрэн, Сангийн сайд Ч.Улаан, Аудитын газрын дарга А.Зангад, Ажлын хэсгийн ах­лагч УИХ-ын гишүүн Б.Болор нараас асуулт асуув. Тойрогт нь хийх ёстой бүтээн байгуулалтын ажлуудаас алийг нь хасч, альд нь хөрөнгө оруулалт өгөхийг гишүүд сонирхож байлаа. Үүнээс гадна авлигажсан төсөв байсан уу, үгүй юу гэдгийг хуулийн байгууллага шалгах ёстой гэв. Дүгнэлтийг хэлэлцэж шийдээд Засгийн газарт чиглэл өгөх УИХ-ын тогтоолын төсөл боловсруулахаар болсон юм. Гэвч УИХ дахь МАН-ын бүлгийн дарга С.Бямбацогт уг асуудалд завсарлага авлаа. Засгийн газар ам.долларын ханшийг 1348 төгрөг барина гэсэн нь тодорхойгүй, Ауди­тынхан авлигажсан эсэ­хийг тодруулаагүй, УИХ, яам, агентлагууд хувийн хэв­шилтэй уялдаатай ажил­лаж чадаагүй учир дахиж нягталж шалгах зүйл байна гэв.
Харин завсарлага авсанд ажлын хэсгийн ахлагч Б.Болор “Төсөв, бүтээн байгуулалттай холбоотой чухал асуудлыг зориуд улстөржүүлж байгаад харамсч байна. Дахиад хэд хоног цаг хугацаа алдах болчихлоо” гэсэн юм. Төсвийн байнгын хорооны дарга Ц.Даваасүрэн “Царцаасан объектуудын дийлэнх нь сургууль, цэцэрлэг, эмнэлэг, дотуур байр. Ужгирсан асуудлыг зогсоох ёстой. Хойшлох тусам хүүхдүүд хохирч байна. 140 тэрбум төгрөгтөө багтааж хүүхэдтэй холбоотой бүтээн байгуулалтаа 2014 ондоо багтааж хийе гэж байхад хойш нь таатаад байх зүйл алга. Гэтэл Байнгын хороондоо оролцож ирц бүрдүүлээгүй мөртлөө энэ ажлыг хойшлууллаа” хэмээн байр сууриа илэрхийллээ. Ажлын тав хоногийн завсарлага авсан учир дараагийн долоо хоног болтол хойшилж байгаа юм.