Тусгай зориулалтаар 2014 онд угалз 28, тэх 41, халиун буга 20, саарал чоно 20, бор гөрөөс 10, цагаан зээр 200 толгойг агнуулах, судалгаа шинжилгээний зориулалтаар идлэг шонхор шувуу 20 хүртэл толгойг барих, 310 толгой тул загас барьж буцаан тавиулахаар тогтлоо. Ан агнуурын менежментийн төлөвлөгөөнд үндэслэн 2013 онд спорт болон олзворын агнуурын чиглэлээр нийт 28 суманд 15  угалз, 32  тэх, 10   халиун буга, дөрвөн  саарал чоно, дөрвөн бор гөрөөс, дөрвөн зэрлэг гахай агнаж, агнуурын төлбөр хураамжийн 520 сая төгрөг сумын болон улсын төсөвт оржээ. Агнуурын менежментийг орон нутагт шилжүүлсэн бодлогын шинэчлэлийн үр дүнд төр хувийн хэвшлийн түншлэлийн харилцаанд тулгуурласан амьтны нөөц хамгаалах эхлэл тавигдаж байна. Орон нутагт байгаль хамгаалах нутгийн иргэдийн гурван холбоо, зургаан нөхөрлөл, дөрвөн төрийн бус байгууллага, малчдын хоёр хоршоо байгуулан ажиллаж байгаа юм.