Засгийн газрын энэ сарын 4-ний өдрийн 110 дугаар тогтоолоор гуравдугаар сарын 26-ны өдрөөс хойш шинээр нэмж мал өвчлөөгүй тул зүүн гурван аймагт тогтоосон хорио цээрийн дэглэмийг цуцалсан билээ. Өнгөрсөн хугацаанд салбарын яам шүлхий өвчний голомт гэгдэх зүүн гурван аймгийн 13 сумын нийт 3454 толгой малыг зориудын устгалд оруулсан байна. Мөн шүлхий өвчинтэй тэмцэх стратегийн дагуу голомтын болон сэжигтэй, хамгаалалтын бүсийн мал сүргийг дархлаажуулах зорилгоор эхний ээлжийн вакцинжуулалтад 1,9 сая толгой мал хамрагдаж, 106.6 хувийн гүйцэтгэлтэй хэрэгжсэн байна. Давтан тарилгын вакцинжуулалт Төв аймгаас бусад аймаг, нийслэлд 100 хувьтай хэрэгжиж дууссан гэж мэдээллээ.