Жорж Клуни эцэст нь сүйт залуу боллоо. Түүнээс сүйн бөгж авч дөнгөсөн азтай бүсгүй бол Амал Аламуддин хэмээн хуулийн зөвлөх бүсгүй. Өмнө нь дандаа загвар өмсөгч, жүжигчин гээд шоу бизийн ертөнцөөс найз бүсгүйгээ сонгодог байсан Ж.Клуни энэ удаа хуульч бүсгүйтэй хайр сэтгэлтэй болсных нэлээн гүнзгий харилцаа холбоо тогтоохыг эрмэлзэж байгаа бололтой. Жүжигчин Талиа Бальзамтай 1989 онд гэрлээд дөрвөн жилийн дараа салахдаа дахин хэзээ ч хүнтэй гэрлэхгүй хэмээн ам гарч байсан Ж.Клуни хэлсэн үгэндээ хүрэх гэсэн мэт хамгийн сайхан бүсгүйчүүдэд хүртэл гэрлэх санал тавихаас татгалзсаар ирсэн. Харин түүний гэр бүлийн амьдрал зохиох талаар бодоход хүргэсэн хүн нь Жулиан Ассанжийг өмгөөлж байсан, Кофи Аннанд зөвлөх хийж явсан 36 настай англи бүсгүй Амал юм.

Анх Жорж Клунийг Жулиан Ассанжийн өмгөөлөгчтэй болзоод байна хэмээн хэвлэлээр шуугихад тэр “бид ердөө л найзууд” хэмээн хариулж байсан бол түүнээс хэдхэн сарын дараа олноос нуугдахгүйгээр болздог болсон юм.
52 настай жүжигчин эр саяхан сайн найз Рэнде Гербер болон Синди Кроуфордын гэр бүлтэй хооллох үеэр сүй тавьсан тухайгаа мэдэгдсэн гэнэ. Топ модель Синди Кроуфордын гэр бүлтэй Жорж Клуни олон жил найзалж нөхөрлөж яваа бөгөөд Ж.Клунигийн найз бүсгүй тэдэнтэй хооллох үеэр сүйн бөгжөө харуулж, баярт мэдээгээ дуулгажээ.


Жорж Клунигийн анхны эхнэр Талиа Бальзам