Австрийн Зальцбург хотын цагдаагийн нэгэн хэсэгт энэ сарын 18-ны орой нэгэн эр ирж эрэн сурвалжилж байгаа гэмт хэрэгтнүүдийн зарлалын самбарыг харж зогссоноо бүр нэгэн ажилтнаас өөрийг нь эрэн сурвалжилж байгаа эсэхийг шүүгээд мэдэж өгнө үү хэмээн хүссэн байна. Цагдаагийнхан үнэхээр тэр гэмт хэрэгтэн бол юу л гэж өөрөө ирж асуух вэ дээ гэж итгэн тэр иргэний хүсэлтийг биелүүлж мэдээллийн сангаасаа шүүж үзвэл 59 настай тэр эрийг Венийн шүүхээс баривчлахаар зарласан нь илэрчээ. Мань хүн санхүүгийн залилангийн хэд хэдэн удаагийн хэрэг үйлдсэн, бусдын эд хөрөнгийг залилан авч байсан гэнэ.
Цагдаа нар тэр эрийн нэрийг зарлаагүй ч “Австрийн хамгийн тэнэг гэмт хэрэгтэн” гэж нэрлэн орон нутгийнхаа шорон руу илгээжээ. Уг нь америкийн нэг гэмт хэрэгтэн бол өөрийг нь эрэн сурвалжилж байгаа эсэхийг интернетээс  олоод мэдчихсэн тохиолдол байдаг юмсанж.