“Хүний өмнөөс ичих бүүр ч хэцүү юм” гэх үг хэнээс ч юм хэзээ ч юм гарчээ. Ичих булчирхай зарим хүнд зориулсан үнэхээр зөв үг гэж санагддаг юм. Өнөөдөр энэ үгийг Засгийн газарт тэр тусмаа Х.Тэмүүжин сайдад хаяглаж хүргэх хэрэгтэй болж. АН-ын бүлгийнхэн ямар ч байсан Х.Тэмүүжин сайдыг хамгаалаад хаацайлаад алдаагаа засч чадна гэж итгээд суудалд нь гагнах нь бололтой.

“Тэр ноцтой алдаа гаргасан гэхдээ засч болох алдаа” гэж хэдийгээр Ерөнхийлөгч өмөөрч өмгөөлөөд  АН-ыг ийм шийдвэр гаргахад нөлөөлсөн ч гэсэн Х.Тэмүүжин сайдын сандал ширээтэйгээ зууралдах гэсэн их хүсэл нь бүүр аазгай хөдөлгөөд хаячих шиг. Өнгөрсөн баасан гаригаас эхлээд амралтын өдрүүдэд киноны дундуур нэвтрүүлгийн голоор ч сэтгэл сэртхийлгэсэн “сэрэмжлүүлэг” олонтаа цацагдсаныг та лав анзаарсан байх. Засгийн газар өөрийгөө өмөөрөө юу гэтэл Хууль зүйн сайд маань өөрийгөө өмгөөлсөн нь энэ юм байх. Залуу хүн, бас зоригтойгоор хуулийн шинэчлэл хэмээн дуугарч бас гараа хөдөлгөж чадсан учраас түүнийг ард түмэн хүндэлсэн, хайрласан. Гэхдээ төрийн сайд маань ард түмнийхээ итгэл, хайрыг дааж чадсан гэж үү.
Түүний алдаа нэг биш, нэжгээд. Тэр тусмаа өөрөө огцрох хүсэлтээ өгөх хангалттай шалтгаан болно ч гэж хэлж болно. Зөвхөн биеэ үнэлэгчтэй орооцолдсон нь түүнд огцрох шалтгаан болох ёстой. Мэдээж улс төрчийн ёс зүйтэй бол...
*1960 онд Их Британийн Батлан хамгаалан яамны сайд нэгэн бүсгүйтэй гэр бүлээс гадуур холбоотой байгаа нь батлагдсан бөгөөд тэрхүү эмэгтэйг нь Оросын тагнуул хэмээн хардаж байлаа. Сайд огцрох өргөдлөө өгөөд суудлаа тавьж өгсөн. Гэвч сайдтай хамт түүний нэр дэвшсэн консерватив намын нэр хүнд ч шороотой холилдсон. Үр дүнд нь дараагийн сонгуульд нь консерватив нам ялагдал хүлээлсэн.
*1999 онд Оросын Ерөнхий прокурор Юрий Скуратов гэгч биеэ үнэлэгчтэй хамт буй бичлэг нь хэвлэлийнхний гарт орж,хэдийгээр өөрөө мэлзэж зугатсан ч гарцаагүй нь батлагдаад ирэхийн цагт суудлаасаа огцорсон.
*2007 онд Израйлын Ерөнхийлөгч Моше Кацав ажилтнуудаа хүчирхийлсэн хэргээр огцорч, долоон жилийн ял авч байсан.
*2008 онд АНУ-ын Нью-Йорк мужийн амбан захирагч Элиот Спитцер биеэ үнэлэгчтэй унтсан хэрэг нь нийтэд ил болж огцорсон.
*2008 онд Финляндын Гадаад хэргийн сайд Илкк Канервэ тайчигч бүсгүйтэй учир ургуулсан хэргээс үүдэн огцорсон.
*Саяхны хэргүүд гэвэл АНУ-ын тагнуулын газрын дарга Дэвид Петроус гэр бүлээс гадуур сэтгүүлчтэй дотно харилцаа тогтоосон хэргээс огцорсон.
-Мөн Олон улсын валютын сангийн ерөнхийлөгч Стросс Кан Фоанцын Ерөнхийлөгчийн сонгуульд өрсөлдөхөөр зэхэж байх үедээ гэр бүлээс гадуур бэлгийн хавьтагчтай байсан хэргээр нэрээ татаж авсан гээд жишээ захаас аваад дурдаж болох юм.
Манай Хууль зүйн сайдын хувьд гэр бүлээс гадуур биеэ үнэлэгч бүсгүйтэй дотно харилцаа тогтоосон, тэр бүсгүй нь хар тамхины хэрэгт орооцолдсон гэдэг шалтгаан нь сайдын сэнтийгээр мултрах наад захын шалтгаан болчихоод байгаа юм.
Хэдийгээр энэ хэргийн талаар хэвлэл мэдээллийн хэрэгслээр тараасан ч сайдтан хүлээн зөвшөөрөхийг хүсэхгүй байгаа.
Гэхдээ түүний хувьд аргал хүртэл хөдөлж эхэлсэн учраас олон нийтийн сүлжээгээр өөрийгөө дэмжих хөдөлгөөн байгуулж, зурагтаар сэрэмжлүүлэг цацаж, зогсолтгүй PR баг ажиллуулж эхэлсэн нь нэг талаар хүмүүсийн дургүйцлийг хүргээд байгаа нь нууц биш.
Ёстой Р.Бурмаа гишүүний хэлээд байгаачлан “зарим нэг нь сайдын суудлаас буувал үхчих гээд байх юм” гэдэг үгийг Х.Тэмүүжин сайдад дамжуулахсан даа.
Аливаа зүйлийн жор тун таарч гэмээнэ эм болдог. Харин жор тунгаа хэтрүүлбэл хор болдог гэдэг дээ...