Хүн барьцаалсан гэмт хэрэг энэ сарын 6-7-нд шил­жих шөнө Хан-Уул дүүр­гийн нутагт гарч, ол­ныг цочирдуулаад байна. Барь­цаалагдсан 10 иргэн Дорнод аймгийн Политехникийн кол­лежийн оюутан бөгөөд олон­хи нь насанд хүрээгүй гэдгийг Цагдаагийн байгуул­ла­гаас өмнө нь мэдээлсэн. Оюутнууд нь гэмт хэрэгт өрт­сөн тухай сонссон сургуулийнх нь захирал нийслэлд ирсэн байна. Цагдаагийн бай­гуул­лагынхан хэргийг шал­гах ёстой учраас оюут­нуу­дыг нутаг буцаахгүй хотод байлгах хэрэгтэй гэх шаардлага тавьсан ч сургуулийн удирдлага эсэр­гүүцэж авч ява­хаар хөө­цөл­дөж буй гэнэ. Энэ талаар Дорнод аймгийн Поли­техникийн коллежийн захирал Д.Энхжаргалаас тод­руулахад “Ийм хэрэг гарс­ны дараа хүүхдүүдийн сэтгэл санаа сайнгүй байх нь тодорхой. Ийм үед аав ээж­тэйгээ байх хэрэгтэй. Хэ­рэв шалгах шаардлагатай бол Дорнод аймгийн Цаг­даа­гийн байгууллагаар дам­жуу­лан шалга гэж хэлсэн. Цаг­даагийнхан болно гэсэн учраас оюутнуудаа авч явахаар бичиг баримтыг нь  хөөцөлдөөд явж байна. Манай хүүхдүүд ямар ч асуудалд оролцоогүй. Тэнд байсан хүмүүс хоорондоо маргалдаж ийм хэрэг гарсан юм билээ. Хүүхдүүд бэртэж гэмтээгүй нь аз. Энэ тухай ар гэрийнхэнд нь мэдэгдсэн” гэв. Тус сургууль “Цэцэрлэгжилт” компанитай хамтын ажил­лагааны гэрээ байгуулан оюут­нуудаа дадлага хийлгэх болсоор гурван жил болж буй гэнэ.

Ямартай ч, сургууль нь эко хотхон болох зорилт тавьж, зураг төслийн дагуу бүтээн байгуулалтаа эхлүүлсэн гэнэ. Тиймээс оюутнуудаа хотхоны ногоон байгууламжийн ажилд оролцуулан нутагт нь дадлагыг нь хийлгэнэ хэмээн тэрээр хэлсэн юм. Шинэ техник технологиос суралцахад хэрэгтэй юм уу гэх үүднээс энд дадлага хийлгэхээр явуулснаа ч тэрээр учирлав. Харин тухайн хэрэг гардаг шөнө чухам юу болсныг оюутнууд захиралдаа ярьсан эсэхийг асуухад “Энэ талаар оюутнуудтайгаа ярилцаж амжаагүй. Цагдаа­гийн байгууллага шалгаж байгаа болохоор үнэн худлыг мэдэхгүй зүйл яримааргүй байна” гэлээ. 

Түүнчлэн энэ хэрэгт Хө­дөлмөрийн яамнаас тайл­бар өгөх ёстой хэмээн за­рим хүн үзэж буй. Учир нь, Хөдөлмөрийн яам “Мэргэ­жилтэй-Ажилтан” хөтөл­­­­бөр хэрэгжүүлж, хүү­хэд залуу­­чуудад богино хуга­­­­­цаанд мэргэжил эзэм­шүү­лэн ажилд зуучлах арга хэмжээ зохион байгуулах болсон. Хөтөлбөрийн сүү­лийн ээлжинд 5200 оюутан хамрагдаж, ид дадлагад гарч эхэлсэн юм. Тэгвэл тус яамныхан барьцаалагдсан оюут­нууд тус хөтөлбөрт орол­цоогүй, политехникийн сур­гуулийн үндсэн ангийн оюут­нууд гэх мэдээлэл өгч бай­на. Гэхдээ л хөтөлбөрийн хү­рээнд дадлага хийж буй оюутнуудын аюулгүй бай­дал, хөдөлмөрийн аюул­гүй байдлыг хангахад хэр­хэн анхаардаг болохыг Хө­дөлмөрийн яамны Мэргэжлийн боловсрол, бод­логын хэрэгжилтийг зо­хи­цуулах газрын дарга Г.Жа­данбаагаас тодруулахад, “Хө­дөлмөрийн аюулгүй байд­лыг хангах нь тухайн бай­гууллагын үүрэг. Улирлын ча­нар­тай бүтээн байгуулалтын ажил эхэлж байгаатай холбогдуулан Хөдөлмөрийн сайд бүх байгууллагад хө­дөлмөрийн аюулгүй байдлыг хангаж ажиллах тухай албан бичиг хүргүүлсэн. Жил бүр оюутнууд дадлагад гардаг. Тэр бүрт багш нар нь хариуцан хамт явж, сахилга бат, ур чадварыг нь дэмжихэд анхаарч ажилладаг. Насанд хүрээгүй бол асран хамгаалах үүрэг ч хүлээдэг. Цаашид ч энэ зарчмаараа явна. Төрийн байгууллага юу ч хийхгүй байснаа, гэнэт гэмт хэрэг  гарлаа гэхээр байгууллагууд руу өөд уруугүй цаас шиддэг байж болохгүй. Бид гэмт хэрэг гараагүй байсан ч хө­дөл­мөрийн аюулгүй бай­далд онцгой анхаарч ажилладаг. Хөдөлмөрийн аюулгүй байдал алдагдсан асуудалд яам яалт ч үгүй хариулах үүрэгтэй. Харин хувь хүний маргааны асуудлыг бид мэдэхгүй шүү дээ. Оюутнууд гэмт хэрэгт өртсөн гэх мэдээллийн дагуу сургуулийнх нь захирал ирсэн байна. Бид тэдэнтэй байнга холбогдож, цаг тухайд нь мэдээлэл авч байгаа” гэв. Дашрамд, гэмт этгээд болох Дорнод аймгийн харьяат М нь  хэргийн газарт байхдаа  оюутнуудад хандан “Ах нь нутгийнхаа дүү нарыг яах ч үгүй. Та нар битгий ай” хэмээн тайвшруулж байсан гэнэ. Дорнод аймгаас дадлага хийхээр ирсэн арван оюутан арвуулаа нутаг буцах бололтой. Тэдний долоо нь аймгийн төвийнх, гурав нь хөдөө сум дахь гэртээ харих юм байна.