Энэ жил нийслэлээс иргэдэд 52 байршилд газар өмчлүүлэхээр шийдвэрлэсэн. Гэхдээ хэрхэн, цэгцтэй олгох журмыг НИТХ-аас батлаагүй учир нийгэмд хүлээлт үүсээд буй. Чухам юуны учир хойшлогдож байгаа болон бэлтгэл ажлаа хэр хангасан талаар НӨХГ-ын Газар өмчлөл, өмчийн ме­нежментийн хэлтсийн дарга Т.Соёлхүү болон бусад алба­ны хүмүүс сэтгүүлчдэд мэдээлэл өглөө.

НӨХГ-ын Газар өмчлөл, өмчийн менежентийн хэлт­сийн дарга Т.Соёлхүү “Монгол Улсад газар өмчлүү­лэх тухай хууль батлагдаад 11 жил болж байна. Энэ хугацаанд газар өмчлөл нэг ч удаа зогсч байгаагүй. Өнөөдөр нэгд, иргэдэд хашаа байшингийнх нь газрыг өмчлүүлэх. Хоёрт, зуслангийн газрыг өмчлүүлнэ. Одоохондоо хэсэгчилсэн ерөнхий төлөвлөгөө нь батлагдаагүй байна. Гуравт, энэ жилээс 52 байршилд иргэдэд газар өмчлүүлэх бэлтгэл ажлыг ерөнхийдөө ханга­сан гэж хэлж болно.Тэгэхээр олон хүний анхаарал татаж буй 52 байршлын хувьд дэд бүтэц, нийгмийн бүхий л асуудлыг нь шийдвэрлэсэн, цэгцтэйгээр газар өмчлүүлэх гэж буй оролдлого юм.  Энэ сарын сүүлийн пүрэв гарагт НИТХ хуралдаж, газар өмчлүүлэх тухай журмыг хэлэлцэнэ. 52 байршлын дэвсгэрийн зураг ч дуусах шатандаа орсон” гэв.

Удтал хүлээлгэсэн 52 байршилд цахимаар бүрт­гэх программ бэлэн болсон эсэхийг нийслэлийн Мэдээ­лэл, технологийн газрын дарга Б.Бат-Өлзийгөөс тод­руу­лахад “Бүртгэлийн программ үндсэндээ бэлэн болсон. Газар өмчлөх хүсэл­тийг цахимаар авдаг болс­ноор газар өмчлөл нээлттэй болж, иргэдэд  эрх тэгш байдал үүснэ. Түүнчлэн танил талтай хүн гайгүй газар өгдөг, ах дүүгийнхээ нэр дээр авсныгаа  зардаг гэх яриа үгүй болох юм. Манай бүртгэлийн сай­тад хандсанаар 52 байрш­­­­­лын хэсэгчилсэн тө­лөв­­­лөгөө, хэчнээн иргэн өмч­­­­­лөх боломжтой гэх мэт дэлгэрэнгүй мэдээлэл гарна” хэмээв.
Энэ үеэр бүртгэл шударга болсон эсэхийг хэрхэн мэдэхийг НӨХГ-ын Мэдээллийн технологийн хэлтсийн дарга Б.Жадамбаагаас тодрууллаа.

-Анх удаа газар өмчлөх хүсэлтийг цахимаар авч, өмчлүүлэх гэж байна. Прог­рамм ямар онцлогтой юм бэ?
-Тийм ээ. Бид программын чадавхийг сайжруулахын тулд маш их ажилласан. Ямар нэгэн алдаа, эндэгдэл гаргахгүйн тулд гадаадын турш­лагыг ч судалсан. Ерөн­хийдөө, иргэдэд ойлгомжтой, олон цонхтой боловсронгуй программ бүтээсэн гэж ойлгож болно.
-Нэг байршлыг сонирх­сон иргэн олон байвал яах вэ. Үнэхээр Дорж, Батаа шударгаар сонгогдлоо гэдгийг яаж мэдэх үү?
-Нэг байршилд олон иргэн хүсэлтээ өгсөн байвал санамсаргүй аргаар машин өөрөө сонгоно. Прораммд хөндлөнгөөс нөлөөлөх ямар ч аргагүй. Бид АТГ болон бусад холбогдох газарт хандаж хамгаалалтыг нь сайжруулсан.
-Цахимаар бүртгэ­хэд товлон, хязгаарласан хугацаа заах уу?
-Тэгнэ. Гэхдээ Газар өмчлүүлэх тухай журам НИТХ-аар батлагдаагүй байна. Энэ журмаар иргэдийн хүсэлтийг цахимаар хэдий хугацаанд авах нь тодорхой болно. Ер нь, журам л батлагдчихвал 52 байршлын газар өмчлүүлэх ажил эхэлнэ дээ.