Дэлхий нийтээрээ “Артерийн гипертензи өвчинтэй тэмцэх олон улсын өдөр”-ийг тэмдэглэж байна.

Энэ өдөр дэлхийн өнцөг бүрт эрүүл мэндийн салбарын төрийн болон төрийн бус байгууллагууд хамтран хүн амын дунд артерийн гипертензи буюу даралт ихсэх өвчин, түүний хор уршиг, эмчилгээ, урьдчилан сэргийлэлтийн талаар мэдээлэл өгч олон нийтийн арга хэмжээ зохион байгуулдаг уламжлалтай.

Статистик судалгаанаас харахад дэлхий дахинаа арван хүн тутмын 3 нь, харин Монгол Улсад хүн амын 40-өөс дээш насны 4 хүн тутмын нэг нь Артерийн даралт ихсэх өвчинтай аж. Ойролцоогоор 1.8 тэрбум даралт ихсэх өвчтэй хүний 50 орчим хувь нь энэ өвчний талаар тодорхой ойлголтгүй байдаг ба цусны даралтаа хэвийн байлгахын тулд эмчилгээний ямар нэгэн арга хэмжээ огт авдаггүй гэх тоо бий.

Өчигдөр “Өөрийнхөө цусны даралтыг мэддэг болъё” уриан дор “Артерийн гипертензи өвчинтэй тэмцэх олон улсын өдөр”-ийг Монголд тэмдэглэн өнгөрүүлсэн.

Тэгвэл энэхүү үйл ажиллагааг дэмжин Олон улсын Актавис компанийн Монгол дахь Төлөөлөгчийн Газар “Даралт ихсэх өвчинтэй тэмцэх дэлхийн өдөр”-ийг Улаанбаатар хотод өргөн хүрээнд тэмдэглэн өнгөрүүлэх санаачлага гаргаж, ЭМЯ, Сүхбаатар дүүргийн ЗДТГ, СБД-ийн Эрүүл мэндийн нэгдэл, Монголын Зүрхний Холбоо, Монголын Өрхийн Анагаах Ухааны Мэргэжилтнүүдийн Холбоо зэрэг байгууллага хамтран маргааш буюу тавдугаар сарын 18-ны ням гаригт “АСА” циркийн хойд задгай талбайд 12.00-16.00 цагийн хооронд иргэдэд зориулсан нээлттэй өдөрлөг зохион байгуулах болжээ.

Мөн Сүхбаатар дүүргийн Эрүүл мэндийн нэгдлийн эмч, өрхийн эмч мэргэжилтнүүдтэй хамтран иргэдэд  цусны даралт хэмжих, биеийн жингийн индекс тодорхойлох, цусан дахь сахар хэмжих зэрэг үйлчилгээг үнэ төлбөргүй хийн цусны даралт ихсэх хандлагатай иргэдэд зөвлөгөө өгч уг өвчний талаарх мэдээлэл багтаасан гарын авлага, зурагт хуудас тараах аж.