Өнгөрөгч амралтын өдрүүдэд Монгол, Хятадын найрамдлын төглийн шав тавих ёслол ӨМӨЗО-ны Ордос дахь Чингисийн онгонд болж Монгол улсаас Өвөрмонголд сурч буй оюутнууд тус газарт мод тарьжээ.

Ёслолд Монгол Улсаас БНХАУ-ын Хөххотод суугаа Ерөнхий консулын газар, ӨМӨЗО дахь Монгол улсын иргэдийн нийгэмлэг, ӨМӨЗО-ны Засгийн газрын Гадаад соёл солилцооны нийгэмлэг, Ордос хотын удирдлагууд, Өвөрмонголын багшийн их сургуульд сурч буй монгол оюутнууд оролцов. Найрамдлын цэцэрлэгт хүрээлэнд анхны модыг тарьсан монгол оюутнууд өөр өөрийн нэрийг сийлсэн төмөр пайзыг модондоо зүүж дурсгалын зургаа татуулсан юм. Энэ нь хоёр орны соёлын харилцааг цаашид улам гүнзгийрүүлэн хөгжүүлэхэд ихээхэн ач холбогдолтой арга хэмжээ боллоо хэмээн ӨМӨЗО-ны Засгийн газрын Хэвлэл мэдээллийн албаны дарга Чин Бао Чуан онцлон тэмдэглэлээ. Тус арга хэмжээ нь  Монгол Хятад хоёр улсын хооронд дипломат харилцаа тогтоосны 65, найрсаг харилцааны 20 жилийн ойн хүрээнд хийгдэж буй ажил юм.