Их Британийн эрдэмтэд гар утаснаас хүүхдийн тархинд үзүүлдэг нөлөөг судлахаар болжээ. Энэ оны есдүгээр сард эхлэх судалгаанд 11-12 насны 2500 хүүхдийг хамруулна. Судалгааны явцад эрдэмтэд хүүхдүүдийн ой санамж, анхаарал, сэтгэн бодох чадварыг судлаад гурван жилийн дараа буюу 2017 онд дахин судалгаа явуулаад харьцуулан үзэх аж. Үүнээс өмнө гар утаснаас хүнд үзүүлдэг нөлөөг судлахдаа зөвхөн насанд хүрэгчдийг хамруулж байсан юм. Их Британийн Засгийн газар ба гар утасны зах зээлд үйл ажиллагаа явуулдаг компаниудын санхүүжүүлж байгаа энэ судалгаанд анх удаа хүүхдүүдийг хамруулж байна. Насанд хүрэгчдийг судлах явцад гар утас хүнд хортой нөлөө үзүүлдгийг батлаж чадаагүй ч өсч, хөгжиж байгаа хүүхдийн бие махбодь гар утасны цацруулдаг долгионд илүү мэдрэмтгий байдаг гэсэн таамаг байдгийг энэ судалгаагаар шалгаж байгаа аж.
Их Британийн Эрүүл мэндийн үндэсний алба нь 16 хүртэлх насны хүүхдүүдийг зайлшгүй шаардлагатай үед гар утсыг ашиглаж байх, ярих хэрэгцээ гарвал “hands-free” системийг ашиглаж байх зөвлөгөөг гаргасан байна.