“Сэрэлт” Монголын уран сайхны киноны Бумаагийн дүрээр үзэгч олны сэтгэлд хоногшин үлдсэн гавьяат жүжигчин Т.Цэвээнжавд зориулан хөшөө босгохоор болжээ.
1944 онд Улсын драмын эрдмийн театраас уран бүтээлийн гараагаа эхэлсэн Т.Цэвээнжав  олон сайхан кинонд гол болон туслах дүр бүтээж, Монголын кино урлагт тодоос тод ул мөрөө үлдээсэн алтан үеийнхний нэг. Түүнийг “Сэрэлт”, “Хүргэн хүү”, “Энэ хүүхнүүд үү” кинонд бүтээсэн дүрээр нь үзэгч олон андахгүй. Мөн үндэсний болон орчуулгын сонгодог жүжгүүдэд ч чадварладаг тоглосон чансаатай жүжигчдийн нэг байсан билээ. Тиймээс ч нэрт жүжигчний хөшөөг босгохоор Улсын драмын эрдмийн театрын дэд захирал, төрийн соёрхолт жүжигчин Н.Сувд, Гавьяат жүжигчин Б.Тунгалаг нараар ахлуулсан уран бүтээлчид ажилдаа орсон гэнэ.
Т.Цэвээнжав агсны уугуул нутаг Дорнод аймгийн Матад сумын 90 жилийн ой энэ онд тохиож байгаа юм. Ойн хүрээнд нутгаасаа төрөн гарсан алдартны хөшөөг ийн босгохоор болсон аж.