Дэлхийн дулаарлын нөлөөгөөр Хойд ба Өмнөд туйлын мөс эрчимтэй хайлж, бүс нутаг дахь байга­лийн баялгийг олборлон ашиг­лах боломж гарсан. Үүнийг дагаад их гүрнүүд Хойд туйлыг булаа­цалдаж эхэлсэн. Хойд туйл ёроолдоо хүн төрөлхтөн олон арван жил ашиглах боломжтой асар их газрын тос, шатдаг хийн нөөцтэй учир Аме­­рик, Канад, Орос, Норвеги, Хятад гэсэн их гү­рэн баялгийг өөрийн өмч гэж батлахын төлөө их мөнгө зарж, цэрэг армиа ч бэлдээд эхэлсэн юм. Гэтэл нөгөө туйл болох Антарктидыг ч их гүрнүүд булаацалдаад эхэлж. 3.6 сая хавтгай дөрвөн км талбайтай Антарктид тив нүүрс, төмрийн хүдэр, хром, никель, зэс, алмаз, газрын тосны асар их нөөцтэй. Гэхдээ тивийн дийлэнх нь зузаан мөсөөр хучигдсан, ашигт малтмал олборлохыг хориглосон олон улсын тохиролцоотой учир өдийг хүртэл хөндөөгүй юм.

1963 онд Орос, Америк зэрэг 46 улс Антарктид тивийг хамтран удирдах гэрээ байгуулж, үйлчлэх хугацаанд өмнөд тивтэй холбоотой бүх төрлийн газар нутгийн маргааныг зогсоосон түүхтэй. Гэхдээ энэ гэрээнд нэгдсэн ямар ч улс хүссэн үедээ гэрээнээс гарч газар нутгийн маргаан эхлүүлэх эрхтэй. Хиймэл дагуулаас авсан зурагнаас үзвэл сүүлийн гурван жилийн дотор Антарктидын мөс хайлах хурд хоёр дахин нэмэгдэж. Ингэснээр ойрын ирээдүйд энэ тивийн байгалийн баялгийг ашиглах боломж бүрдэж буй юм. Австрали улс боломжийг эртхэн ашиглахаар шийдсэнээ албан ёсоор мэдэгдсэн. Тус улсын Байгаль орчны сайд Грег Хант “Олон улсын эрх зүйн дагуу Австрали нь Антарктид тивийн газар нутгийг өөрийнх гэдгээ баталгаажуулахын тулд өмнөд тивд идэвхтэй үйл ажиллагаа явуулах ёстой. Бид энэ тивийн газар нутгийн 42 хувийг өөрийнх гэж үзэж байгаа. Хэрэв бид одоо л энэ газар нутгаас татгалзвал хойч үедээ туйлын хариуцлагагүй хандсан хэрэг болно” гэв.

Австраличууд Антарктидад явуулж буй үйл ажиллагаагаа эрчимжүүлэх үүднээс эхний ээлжинд мөс зүсэгч шинэ усан онгоц захиалан үйлдвэрлүүлж эхэлжээ. Олон зуун сая ам.долларын үнэтэй усан онгоц нь 1200 тонн ачаа тээвэрлэж, 1.65 метр зузаан мөсийг зүсэх чадвартай. Түүнчлэн Антарктид руу Тасмани арал дээрх усан онгоцны боомт, нисэх буудлыг өргөжүүлэн сайжруулахад мөн л олон арван сая ам.доллар зарцуулахаар болсон байна.