Хятадын Шинжаан-Уйгарын автономит мужийн Өрөмч хотын цэцэрлэгт хүрээлэнд машин дэлбэрч, гал гарсан тухай тус улсын хэвлэлээр мэдээлж байна. Цэцэрлэгт хүрээлэнд цугласан хүмүүс рүү хоёр машин хурдлан ирж, удалгүй дэлбэрсэн хэмээн гэрчүүд мэдүүлжээ. Одоогоор тэнд түймэр дэгдээд байгаа юм.
Уг хэргийн улмаас 31 хүн амь үрэгдэж, 100 орчим хүн шархаджээ. Үүнийг  Шинжаан-Уйгар мужийг Хятадаас салгаж, тусгаар улс болохын төлөө тэмцдэг бүлэглэлүүдийн үйл ажиллагаатай холбон тайлбарласан аж. Уйгарын салан тусгаарлагчдын идэвх сүүлийн хоёр сарын турш огцом эрчимжсэн. Тухайлбал, дөрөвдүгээр сарын сүүлээр газрын тэрэгний буудалд дэлбэрэлт болж гурван хүн амиа алдаж, 80 гаруй нь шархадсан хэрэг гарч байв.