Сэргээн засалт хөгжлийн үндэсний төв ДЭМБ, Филлипин, Энэтхэгийн мэргэжилтнүүдтэй хамтран АНУ-ын хөгжлийн агентлагийн санхүүжилтээр “Тэргэнцэрийн зөв хэрэглээг төлөвшүүлэх” сэдэвт сургалтыг Монголд анх удаа зохион байгуулж байна.

Энэхүү сургалтаар тулгуур эрхтний бэрхшээлтэй иргэдэд зориулсан туслах хэрэгслийн хүртээмжийг нэмэгдүүлэх, түгээх, тэргэнцэртэй иргэдийг зөв байрлуулж суулгах, арчлах, тэдэнд давхар бэрхшээл үүсэхээс сэргийлэх талаар цогц мэдээллийг олгох юм байна. Тус сургалтыг Тэргэнцэр тохируулах, сургагч багш бэлтгэх, Тэргэнцэр түгээх үйл ажиллагааг зохион байгуулах менежерүүдийн сургалт, Тэргэнцэр түгээгч үйл ажиллагаанд оролцогч талуудын хэлэлцүүлэг гэсэн гурван үе шаттай явуулах бөгөөд энэ сарын 14-нийг хүртэл Сэргээн засалт хөгжлийн үндэсний төвд үргэлжлэх юм.
Сургалтыг гадаад, дотоодын сургагч багш нар удирдан явуулж байгаа ба хот, хөдөөгийн хөгжлийн бэрхшээлтэй иргэдийн асуудал хариуцсан мэргэжилтнүүд, тулгуур эрхтний бэрхшээлтэй иргэд нээлттэй оролцох боломжтой. Мөн уг сургалтаар бэлтгэсэн сургагч багш нар цаашид хөдөө орон нутагт хүрч ажиллана.