Төлбөрт таавар, мөрийтэй болон бооцоот тоглоомын тухай хуулийн төслийн үзэл баримтлалын төслийг Засгийн газарт хэлэлцээд зарчмын хувьд дэмжлээ. Гэхдээ сайд нарын дэвшүүлсэн саналыг тусгаж, боловсруулахаар болжээ. Төлбөрт таавар, мөрийтэй болон бооцоот тоглоомын тухай хуулиар Монгол Улсын нутаг дэвсгэрт төрөөс төлбөрт таавар, мөрийтэй болон бооцоот тоглоомын нийлүүлэлт, хэрэглээг хязгаарлан зохицуулах, үйл ажиллагааг хянах, тоглогчийг мөрийтэй тоглоомд донтохоос урьдчилан сэргийлэх, өртөмтгий тоглогчийг хамгаалахтай холбогдсон харилцаа зохицуулах юм. Хуулийн төсөл долоон бүлэг, 32 зүйлтэй байх аж. Засгийн газрын шийдвэрээр байгуулах Зохицуулах хороо нь тусгай зөвшөөрөл олгох, тусгай зөвшөөрөл эзэмшигчийн үйл ажиллагаанд мөрдөгдөх дүрэм, журмыг батлах, хэрэгжих байдалд хяналт тавьж, зохион байгуулах замаар хуулийн хүрээнд шаардлагатай механизм бүрдүүлнэ гэж үзжээ.