2013 оны аравдугаар сард Бээжингийн Тяньаньмэний  талбайд халдлага хийж таван хүний аминд хүрсэн гэж Хятадын шүүх гурван эрэгтэйд цаазаар авах ял оноолоо.
Хятадын хэвлэлүүдэд бичсэнээр цаазын ял авсан хүний хоёр нь Дорнод Туркестаны уугуул, лалын шашны суннит урсгалын шүтлэгт уйгур үндэстэн юм байна.
Сүүлийн жилүүдэд уйгурын салан тусгаарлагчдын янз бүрийн халдлага үйлдэлд хятадын эрх баригчид нэлээд хатуу хариуцлага тооцож байгаа юм гэж интерфакс агентлаг дамжуулжээ.
Энэ гурван хүнээс гадна нэг эрэгтэйг бүх насаар нь хорих, дөрвөн хүнийг 5-20 жилийн хорих ялаар шийтгэсэн байна.

2013 оны аравдугаар сарын 28-ны өдөр Тяньаньмэний талбайд автомашин дэлбэлсний уршгаар таван хүн амь үрэгдэж, 38 хүн шархадсан юм. Автомашин төв талбай руу орж, хятадын эзэн хааны ордон музейн цогцолбор  “Гугун”-ы  үүдэн тушаа олон хүнтэй газар очоод дэлбэрч шатсан юм. Цагдаагийн газрын мэдээлснээр энэ машиныг  шинжааны хязгаарын Усмен Хасан гэгч жолоодож очжээ. Машин дэлбэрэх үед тэнд түүний эхнэр, ээж нь байсан гэнэ.
Цагдаагийнхан машинаас савтай бензин, хоёр хутга, төмөр ташуур, хядлага сурталчилсан бичээс бүхий далбаа олжээ. Цагдаа нар бас сэжигтэн уйгуруудын  амьдарч байсан байрнаас “жихад”-ын туг, хутга олсон гэдэг.