Үндэсний агаарын тээвэрлэгч “МИАТ” компани ХБНГУ-ын Франкфурт хот руу энэ сарны 19-нд “Б767-300ER” онгоцоор шууд нислэг үйлдэх гэж байна. “МИАТ”-ТӨХК-ийн агаарын хөлөг Улаанбаатарын цагаар 10:15-д хөөрч Германы цагаар 13:00-т Франкфурт хотын “Frankfurt Main”  олон улсын нисэх буудалд газардах юм.
Франкфуртын олон улсын нисэх буудал нь дамжин нислэг үйлдэхэд хамгийн тохиромжтой бөгөөд транзит танхимтай учир дамжин нислэг хийж байгаа иргэдэд визтэй холбоотой чирэгдэл гарахгүй юм байна.  
Шинэчлэлийн Засгийн Газрын 2012-2016 оны үйл ажиллагааны хөтөлбөрт “Монгол Улс руу чиглэсэн олон улсын нислэгийн давтамж, чиглэлийг хоёр дахин нэмэгдүүлэх“-ээр тусгасан. Иймээс “МИАТ” ТӨХК  Засгийн газрын хөтөлбөр болон компанийнхаа Ази, Европийн чиглэлийн нислэгийн сүлжээг өргөжүүлэх бодлогын хүрээнд Герман улсын метрополис хот Франкфурт руу шууд  нислэгийн шинэ чиглэлээ ийнхүү нээж байна.
Дашрамд дурдахад тус компани Франкфуртын чиглэлийн эхний таван нислэгийн тийзээ хямдралтай үнээр борлуулж,  анхны нислэгийн зорчигчдодоо гарын бэлэг өгөх гэнэ.  
“МИАТ” ТӨХК Европ тив рүү нислэгийн давтамж, чиглэлээ ийнхүү нэмэгдүүлснээр аялал жуулчлалын цагаар онгоцны суудал олддоггүй, нислэгийн тийз үнэтэй, шууд нислэггүй учраас хугацаа алддаг зэрэг асуудал тодорхой хэмжээгээр шийдэгдэх юм.