ОХУ-ын нисйлэл Москва орчмын Алабины буудлагын талбайд болж байгаа бүх оросын “Танкийн биатлон-2014” уралдаанд манай танкчид оролцож байна. Өнөөдрөөс зургадугаар сарын 28 хүртэл болох энэ тэмцээнд манайхаас гадна Армен, Белорусс болон Казахстан, Киргиз, Таджикистан, Ангол, Венесуэл, Энэтхэг,  Серби, Хятадын зэвсэгт хүчний танкчид оролцож байгаа юм байна.
Тэмцээний үеэр танкчид  зөвхөн Т-72Б танк төдийгүй явган цэргийн БМП-2 машинаар бартаат болон шулуун замаар уралдаж, зогсоо байдлаас  болон явдал дундаа бай буудан өрсөлдөнө. “Танкийн биатлон-2014” тэмцээний нээлтэд зориулж Оросын цэргийн баруун тойргийн Кантемировын дивизийн танкчид “танкийн балет” үзүүлбэр бэлтгэн 30х30 метрийн хэмжээтэй талбайд танкаар вальс, кадриль “бүжиж” үзүүлжээ.

Танкийн экипажуудын дунд жолоодох урлаг, буудлагын төрлөөр явуулдаг энэ тэмцээнийг хамгийн анх 1963 онд НАТО-гийн гишүүн орнуудын зэвсэгт хүчний дунд Канадад зохион байгуулж байсан юм байна. ЗХУ-д 1970-аад оны сүүлчээр анх зохион байгуулжээ.
2013 оны “Танкийн биатлон”-д оросын баг тэргүүлж, Казахстаны танкчид хоёрдугаар байр эзэлж байсан юм.