“Монголын байгаль хамгаалах иргэний хөдөлгөөнүүдийн эвсэл” төрийн бус байгууллага нийтийн эрх ашгийн үүднээс Дорнод аймгийн Матад сумын газар нутагт нөхөн сэргээлт хийлгэх, хохирол барагдуул хэмээн “Петро Чайна Дачин Тамсаг” компанийг өнгөрсөн оны есдүгээр сард Баянзүрх дүүргийн шүүхэд өгсөн. Тус дүүргийн шүүх өнгөрсөн сард уг нэхэмжлэлийг хэлэлцээд “Петро Чайна Дачин Тамсаг” компани Дорнод аймгийн Матад сумын дөрөвдүгээр багийн нутаг Тосон-Уул 19 дүгээр талбайд газрын тосны үйл ажиллагаа явуулахдаа байгаль хамгаалах, нөхөн сэргээх үүргээ бүрэн биелүүлээгүй учир нөхөн төлбөр нэг тэрбум 356 сая 622 мянга 460 төгрөг гаргуулж, тус сумын төсөвт оруулах, байгаль орчныг нөхөн сэргэхийг тус компанид даалгасан шийдвэр гаргажээ. Харин тус компанийнхан эл шийдвэрийг эсэргүүцэж, хэрэгсэхгүй болгуулахаар дараагийн шатны шүүхэд давж заалдах гомдол гаргасан байна.   

Г.АЛТАН