Колумбаас ирсэн хайрцагтай гадил жимсийг Португалийн хот хөдөөгийн хэд хэдэн сүлжээ дэлгүүр автал дотор нь  хар тамхи хийчихсэн байх нь илэрчээ. Валенса хотын нэгэн оршин суугч сүлжээ дэлгүүрээр үйлчлүүлж байтал лангуун дээрх гадил жимсний хайрцгаас нь үл мэдэгдэх цагаан нунтаг зүйл гоожиж байхыг хараад цагдаад мэдэгдсэнээр энэ хэрэг илэрсэн байна. Рейтер агентлагийн мэдээлснээр хууль сахиулагчид нийтдээ 237 кг хүрэхээр 198 уут кокаин олж хураажээ.

Өнгөрсөн зургадугаар сарын эхээр яг ийм тохиолдол Их Британи, Черногорид гарч байсан юм. Черногорийн цагдаагийнхан мөн л гадил жимсэнд нуусан 220 кг кокаин илрүүлсэн бол британийн Портсмутад гадил ачиж ирсэн колумбын хөлөг онгоцноос бас л 175 кг “кокса” олж хураасан юм.