Барилга, хот байгуулалтын яамнаас хувийн хэвшилд олгодог үйл ажиллагааны хэд хэдэн төрлийн зөвшөөрлийг тус салбарын төрийн бус байгууллагаар дамжуулан гэрээний үндсэн дээр гүйцэтгүүлэх гэнэ. Засгийн газар дараах төрлийн үйлчилгээний эрхийг яамнаас шилжүүлэх тогтоол гаргахаар болжээ. Үүнд, хот байгуулалтын баримт бичиг, барилга байгууламжийн зураг, төсөл боловсруулах, барилгын ажил гүйцэтгэх, материалын үйлдвэрлэл, өргөх байгууламж, түүний эд ангийн үйлдвэрлэл, угсралт, засвар үйлчилгээ эрхлэх хуулийн этгээдэд тусгай зөвшөөрөл багтана. Энэ чиг үүргийг төрийн бус байгууллагаар гүйцэтгүүлснээр барилгын асуудал эрхэлсэн төрийн захиргааны төв байгууллага хууль тогтоомжид заасан салбарын техникийн бодлого боловсруулж, нэвтрүүлэх болон бусад өргөн хүрээний асуудалд илүү анхаарч ажиллах, бодлогоо барьж, төсөл хөтөлбөр санаачлан ажилласнаар хүний эрүүл мэнд, амь нас, байгаль орчинд сөрөг нөлөөгүй барилга байгууламж барьж, чанар аюулгүй байдал хангагдана гэж үзжээ.
Дээр дурдсан чиг үүргийг төрийн бус байгууллагаар гүйцэтгүүлэх гэрээнд талуудын хүлээх үүрэг хариуцлага, санхүүгийн асуудлыг тодорхой тусгаж, гэрээний хэрэгжилтэд хяналт тавьж ажиллахыг Барилга, хот байгуулалтын сайд Ц.Баярсайханд даалгав.