Бүгд найрамдах Солонгос улсын Үндэсний Ассамблейн Гадаад бодлого, үндэсний нэгдлийн байнгын хорооны дарга Юү Ки Жүн тэргүүтэй төлөөлөгчид манай улсад айлчиллаа. Тэднийг УИХ-ын дэд дарга Р.Гончигдорж хүлээн авч уулзжээ. Энэ жил манай хоёр улс дипломат харилцаа тогтоосны 25 жилийн ой тохиож буй юм. Р.Гончигдорж солонгосын төлөөлөгчдийг хүлээн авч уулзсанд ноён Юү Ки Жүн талархаад хоёр улсын нийгэм, эдийн засаг, улс төрийн харилцаа, хамтын ажиллагааг өргөжүүлэн хөгжүүлэх хүсэлтэй байгаагаа илэрхийлэв. Ноён  Юү Ки Жүн нь БНСУ-ын эрх баригч Сенүри намын гишүүн. Пусаны Сөгү тойргоос Үндэсний Ассамблейд гурав дахь удаагаа сонгогдон ажиллаж байгаа эрхэм аж. Тэднийг хүлээн авах уулзалтад УИХ-ын гишүүн Г.Батхүү, Монгол Улсаас БНСУ-д суугаа Онц бөгөөд Бүрэн эрхт Элчин сайд Б.Ганболд, УИХ-ын Тамгын газрын Ерөнхий нарийн бичгийн дарга Б.Болдбаатар нар болон албаны бусад хүн оролцжээ.