Дүүргийн эрүүгийн хэргийн анхан шатны хоёрдугаар шүүхээс "Монгол газар" ХХК-ийн захирал Ц.Мянганбаярт Эрүүгийн хуулийн тусгай ангийн 214 дүгээр зүйлийн 214.2 т зааснаар 1.000.000 төгрөгийн эд хөрөнгө хурааж, хөдөлмөрийн хөлсний доод хэмжээг 100 дахин нэмэгдүүлсэнтэй тэнцэх хэмжээний буюу 19.200.000 төгрөгийн торгуулийн ял оногдуулсан байна.

Дүүргийн хоёрдугаар прокурорын газраас эрүүгийн 201315000340  дугаартай яллагдагч Ц.Мянганбаярт холбогдох “2013 оны 8 дугаар сараас 10 дугаар сарын 14-ний өдрийг хүртэлх хугацаанд Өвөрхангай аймгийн  Уянга сумын 6 дугаар багийн нутаг дэвсгэрт орших Бөөрөлжүүт гэх орон нутгийн тусгай хамгаалалттай газарт хууль бусаар ашигт малтмал ашиглах, олборлох үйл ажиллагааг гардан зохион байгуулж байгаль орчинд нийт 378.087.860 төгрөгийн онц их хэмжээний хохирол учруулсан”  хэрэгт Эрүүгийн хуулийн тусгай ангийн 214 дүгээр зүйлийн 214.2 дахь хэсэгт зааснаар прокурорын яллах дүгнэлт үйлдэж, 2014 оны 6 дугаар сарын 19-нд харъяаллын дагуу Дүүргийн эрүүгийн хэргийн анхан шатны 2 дугаар шүүхэд шилжүүлээд байсан юм.