Шинэчлэлийн Засгийн газар, Эрүүл мэндийг дэмжих сангийн санхүүжилтээр өнгөрсөн оны арванхоёрдугаар сард Эрүүл идэвхтэй амьдралын клубын хамт олон III, IV хорооллын эхэнд “Залуус 21” клуб байгуулсан. Архигүй анхны клуб хэмээн нээлтээ хийсэн энэ газрын байранд “Зурагт” хэмээх хүнсний зах үйл ажиллагаа явуулах болжээ.

Энэ талаар Эрүүл идэвхтэй амьдрал клубын зөвлөх Ж.Цогтсугараас тодруулахад “Манайх хаалгаа бариагүй. Түрээсийн байранд үйл ажиллагаа явуулж байгаад больсон. Архи дарс зарж, ашиг олдоггүй тул түрээсийнхээ төлбөрийг төлж чадахгүйд хүрсэн. Сард 10 сая төгрөгийн түрээс төлж, ажилтнуудын цалин, урсгал зардалд 4-5 сая төгрөг зарцуулдаг. Ингэхээр ашиг олох нь байтугай гаргаж буй зардлаа ч нөхөж чадахгүй. Гэхдээ бид энэ асуудлаа Монголын залуучуудын холбоонд дуулгахад нааштай хүлээж авсан тул тэднийхтэй хамтран үйл ажиллагаагаа үргэлжлүүлэх болсон. Тоног төхөөрөмжөө авчраад байна. Залуучуудын холбоо байр гаргаж өгнө, түрээсийн төлбөр авахгүй гэсэн. Бид ийнхүү залуучуудын төлөө, архигүй нийгмийн төлөө хамтран ажиллахаар болоод байна” гэлээ. Харин МЗХ-ны ажилтнаас тодруулахад “Шийдвэр нь албан ёсоор гараагүй байгаа” хэмээв.