ӨМӨЗОрны Альшаа аймгийн Эзнээ хошууны төв Далай хөв хотноо Алтан тоорой модны олон улсын наадмын нээлтийн ёслол есдүгээр сарын 27-ны өдөр албан ёсоор нээлтээ хийж, Торгууд нутгийн шаргал тооройн мод, манхан нутгийн ганган тэмээгээрээ алдаршсан Эзнээ нутгийн алтан намрын тоорой модны 15 дугаар аялал жуулчлалын наадам ийнхүү эхлэв. Наадмын үйл ажил­ла­гааг Эзнээ хошууны Засаг дар­га Мөнхөө нээж хэл­сэн үгэн­дээ Баянхонгор аймаг, Эзнээ хошуу хоорондын най­рам­далт харилцаа, хамтын ажил­­лагааг бэхжүүлэхэд ан­хаарч ажиллахаа онцолж байв.

Хол ойр, дотоод гадаадын олон жуулчин элсэн манхантай Альшаа нутгийн шаргал тооройн модот Торгууд нутагт хуран цугласан. Баянхонгор аймгаас ИТХ-ын дарга Д.Ширмэн, аймгийн Засаг даргын орлогч Д.Ганбаяр нараар ахлуулсан 20 хүний бүрэлдэхүүн оролцов. Мөн аймгийн ХДТеатрын уран бүтээлчид Алтан тооройн наадамд оролцож бүрэн хэмжээний урлагийн тоглол­тоо толилуулж байгаа аж.

Бүтэн сар үргэлжилдэг тус наадмын үеэр томоохон хэмжээний урлагийн наадам, үндэсний уламжлалт спортын тэмцээн, өөрийн онцлогтой аялал жуулчлал, эл төрлийн үзэсгэлэн яармаг, гэрэл зураг авах, уран бичлэгийн уралдаан болон худалдаа арилжааны хэлэлцээр хийх зэрэг олон төрлийн үйл ажиллагаа­гаар дамжуулан Эзнээ ногоон бүрдийн байгалийн гайхамшиг, урт удаан түүх соёл болон үндэсний зан үйлийг харуулдаг байна. Алтан тоорой олон улсын наадам нь Хятад улсын иргэдийн жуулчлалын үйл ажиллагаанд багтдаг, ӨМӨЗОрны гурван том баярын нэг нь юм байна.

Эзнээ хошууны энэ удаа­гийн тоорой модны наадам нь урлагийн тоглолт, Торгууд үндэсний хувцас заслын уралдаан, Монгол үндэсний эрийн гурван наадам, морь, тэмээний уралдаан зэрэг үндэсний уламжлалт наадмаа голлын зохион байгуулж байгаа аж. Монгол үндэсний барилдаанд Эзнээ нутгийн аварга бөхчүүд зодоглосон төдийгүй Альшаа зүүн, баруун хошууны бөхчүүд болон Өлгий шилийн гол, Хөлөнбуйраас бөхчүүд ирж ид хаваа гайхуулан барилдах ажээ.