Морин хуурын чуулгыг үүсгэн байгуулагч, уран сайхны удирдагч, Ардын жүжигчин, профессор Ц.Батчулууны эмчилгээний зардлыг бүрдүүлэх аяны уриалга гаргаж урлагийнхан ард түмэндээ хандаад байна.

Түүнд гадаад улсад яаралтай хийлгэх эмчилгээний зардал 250-300 сая төгрөг шаардлагатай болжээ. Энэхүү хөдөлгөөн Монголд төдийгүй гадаадад суугаа Монголчуудын дунд өрнөж байгаа юм. Энэхүү чин сэтгэлийн аяны уриалгад М-Си-Эс групп дэмжлэг үзүүлж хандивын дансанд 25 сая төгрөг шилжүүлсэн баримтыг Ц.Батчулууны гэргий Б.Алтантуул болон хандивын аяныг зохион байгуулагчдад гардуулж өгчээ.

Манай үндэсний хаан хөгжим болох морин хуур хөгжмийн  хөгжлийн төлөө насаараа зүтгэж яваа түүний эмчилгээнд зориулсан “Эгшгэн өргөл” хандивын тоглолтыг энэ сарын 20-22-ныг дуустал СТӨ-ний тайзнаа зохион байгуулж байна.