Үйлдвэр хөдөө аж ахуйн дэд сайд Ц.Туваанаас цөөн асуултад хариу авлаа.

-Нөөцийн мах бэлтгэх компаниуд махаа бэлдээд эхэлсэн байх. Энэ тухайд?
-Нөөцийн махны менежер компани шалгаруулах ажил дууссан. Дөрвөн компани шалгарсан. Баатарууд тэнгэр, Эй энд ЭМ, Мах маркет, Мах импекс гэсэн компани тус бүртээ 3000 тонн мах бэлтгэхээр шалгарсан. Одоогоор эдгээр компани 3000 тонн махаа өөрсдөө бэлдэж нөөцлөх ажилдаа орсон. Цагаан сарын өмнөөс эхлэн худалдаанд гаргана. Үнийн хувд өнгөрсөн жилийн үнээс өсгөхгүй.

-Махаа өөрсдийнхөө хөрөнгөөр бэлдэж байгаа юу?
-Энэ жилийн нөөцийн мах бэлтгэх компаниуд мах бэлтгэх хөрөнгөнийхөө 40 хувийг өөрсдөө гаргаж байгаа. Үлдсэн 60 хувийг “Монгол Банк”-ны үнэ тогтворжуулах дэд хөтөлбөрийн хүрээнд олгоно.

-Өнгөрсөн хавар нөөцийн махны үнэ зах дээрх махны үнэтэй бараг ойролцоо байсан.  Нөөцийн мах үнэтэй байна гэсэн шүүмжлэл их гарч байсан шүү дээ. Тэр жишгээрээ л байна гэсэн үг үү?
-Тийм нөхцөл байдал үүсэх юм бол махны компаниуд, холбоодтойгоо ярилцаж байгаад нөөцийн махны үнийг бууруулах арга хэмжээ авна л даа.

-Ноднин тийм арга хэмжээ авч чадаагүй гэсэн үг үү?
-Ноднин бол махны компаниуд зах зээлийнхээ судалгаанд үндэслээд борлуулалтаа бодоод сүүлдээ үнээ буулгаж зарсан шүү дээ.