УИХ дахь эмэгтэй гишүүдийг төлөөлж УИХ-ын гишүүн Л.Эрдэнэчимэг, С.Одонтуяа, Г.Уянга, З.Баянсэлэнгэ нар “Х ТҮЦ” хамтлагийн жүжигчин МУГЖ И.Одончимэг, “Шинэ үе” хамтлагийн жүжигчин МУСТА Г.Ундармаа нарыг өнөөдөр Төрийн ордонд хүлээн авч баяр хүргэлээ.

 “X ТҮЦ” продакшны жүжигчин МУГЖ И.Одончимэг нь “Мобиком” компаниас хэрэгжүүлсэн “Зүрх бүхний төлөө” хөтөлбөрийн шилдэг оролцогчоор тодорч “Улаанчулуутын хогийн цэг дээрх хүүхдүүдэд боловсрол олгоход дэмжлэг үзүүлэх” төслөө амжилттай хэрэгжүүлж буй. Харин жүжигчин Г.Ундармаа нь “Итгэлийн танхим” төслийг 2011 оноос  хэрэгжүүлж эхэлсэн. Тэрээр 2011 онд Нэгдүгээр амаржих газрын хүлээлгийн өрөө, Улсын нэгдсэн төв эмнэлгийн Яаралтай тусламжийн төвийн хүлээлгийн танхим, Эх хүүхдийн эрүүл мэндийн үндэсний төвийн хүлээлгийн танхимуудыг тус тус тохижуулжээ. Иймд нийгмийн сайн сайхныг төлөөх үйлсэд хувь нэмэр оруулж буй хоёр жүжигчиндээ УИХ-ын эмэгтэй гишүүд талархан, дэмжиж байгаагаа илэрхийлэв.

Энэ үеэр Л.Эрдэнэчимэг гишүүн “УИХ-ын эмэгтэй гишүүд бидний зорьж ажиллаж байгаа нэг зүйл нь сургууль, цэцэрлэгийн хүүхдүүд, мөн эмэгтэйчүүдийн төлөө юм. Тэгэхээр бидэнтэй хүсэл зорилго нэг та бүхэндээ баярлаж байна. Цаашид энэ талаар хамтарч ажиллах болно” гэлээ. Жүжигчин бүсгүйчүүд ч тэднийг хүлээн авч уулзаж байгаад талархаж буйгаа илэрхийлээд хамтарч ажиллахад бэлэн гэлээ.