Энэ сарын 10-16-ны өдрийг хүртэлх хугацаанд улсын хэмжээнд 159.557 хүн амбулаториор үйлчлүүлжээ.

Үүнээс 10.305 хүн буюу 6.5 хувь нь томуу, томуу төст өвчинтэй гэж оношлогджээ. Энэ сарын 20-ны өдрийн байдлаар Нийслэлийн дүүргүүдийн Нэгдсэн эмнэлгийн хүүхдийн орны ачаалал 38.4 хувиар хэтэрсэн үзүүлэлттэй байна. Харин сургууль, цэцэрлэг зэрэг хүүхдийн байгууллагын ирцийн тандалтыг Нийслэлийн долоон дүүргийн харуулдан тандалтын 34 нэгжид хийхэд энэ сарын 21-ний өдрийн байдлаар хүүхдийн ирц 93.0-98.1 хувьтай гарчээ. Энэ нь томуу, томуу төст өвчний түвшин нь сургууль, цэцэрлэгийн үйл ажиллагааг түр зогсоох хэмжээнд хүрээгүй байгаа учраас Өрхийн эрүүл мэндийн төвүүдээс гэрийн идэвхтэй эргэлт, үзлэгийг эрчимжүүлэх арга хэмжээг авах, нийслэлийн эрүүл мэндийн нэгдлүүд орны ачааллыг бууруулах чиглэлээр зохицуулалт хийх, хүн амд томуу, төст өвчнөөс сэргийлэх талаар мэдээлэл, сургалт сурталчилгааг өргөжүүлэх зэргийг анхаарч ажиллах зөвлөмжийг мэргэжлийн байгууллагад хүргүүлж байна гэж ЭМЯ-ны Шуурхай удирдлагын төвөөс мэдээллээ.