Мэргэжлийн хяналтын байгууллагаас эмийн үйлдвэрүүдэд хяналт шалгалт хийжээ. Шалгалтын үеэр дараах зөрчил илэрсэн болхыг албаныхан тайлагнасан юм.  Эм үйлдвэрлэн зах зээлд нийлүүлсэн 27 эмийн үйлдвэрийн давхардсан тоогоор нийт 1176 нэрийн эм, биологийн идэвхт бүтээгдэхүүний 71,4 хувь буюу давхардсан тоогоор 838 нэрийн эм, биологийн идэвхт бүтээгдэхүүн улсын бүртгэлд бүртгэгдээгүй нь тогтоогджээ. Мөн Эмийн үйлдвэрүүдийн 28,6 хувь нь эмийн түүхий эдийг эмийн улсын бүртгэлд бүртгүүлээгүй, 24 хувь нь тухайн үйлдвэрлэл эхлэхээс өмнө эмийн түүхий эд, эмийн туслах бодисыг итгэмжлэгдсэн лабораторийн шинжилгээнд хамруулдаггүй гэнэ. Түүнчлэн тарилгын эмийн үйлдвэрүүдийн 28,6 хувь нь ажиллагсад, бараа материал нь агаар тусгаарлагчаар дамжин үйлдвэрлэлдээ ордоггүй, 43 хувь нь агаар тусгаарлагчийн хаалга нь шаардлага хангаагүй гэсэн дүн авчээ. Өөрөөр хэлбэл тарилгын эмийг ариун цэврийн шаардлага бүрэн хагаагүй нөхцөлд үйлдвэрлэж байна гэсэн үг. Шалгалтанд хамрагдсан долоон үйлдвэрийн 33 нэрийн эм, эмнэлгийн хэрэгслээс дээж аван 243 үзүүлэлтээр Хүнсний аюлгүй байдлын лавлагаа лабораторийн Эм, биобэлдмэлийн лабораторийн шинжилгээнд хамруулахад таван нэрийн эм  чанарын шаардлага хангахгүй байжээ. Эмийн үйлдвэрүүдэд тавигдах хамгийн гол шаардлага буюу тоног төхөөрөмжийг зориулалтандаа тохирсон, шат дамжлагын дарааллаар зөв байрлуулж, суурилуулаагүй, нэг цуврал бүтээгдэхүүний үйлдвэрлэл дуусмагц тоног төхөөрөмжийг цэвэрлэж, тохируулгыг шалгаж, ариутгал халдваргүйтгэлийг хийн бүртгэн үр дүнд хяналт тавих ёстой ч энэ шаардлагыг огт хангадаггүй гэх гонсойм мэдээллийг өгсөн юм. Эмийн үйлдвэрүүдийн тал хувь нь нь үйлдвэрлэлд ашиглаж буй тоног төхөөрөмж нь бүтээгдэхүүнд аюул учруулахгүй, бүтээгдэхүүнтэй хүрэлцдэг хэсгүүд нь урвалд орох, шингээх шинж чанарыг агуулаагүй болохыг тогтмол шалгаж, үнэлгээ дүгнэлт гаргадаггүй байжээ. Өөрөөр хэлбэл монголчууд баталгаагүй эм хэрэглэж байна гэсэн үг. Эмийг улсын бүртгэлд бүртгэх ёстой ЭМЯ ажлаа мэддэггүйгээс үү эсвэл, эм үйлдвэрлэгчидийн буруу юу, юутай ч монголчууд бид биеэ эмнэх гээд хор болох зүйл ч хэрэглэж байж мэднэ гэдгийг энэхүү шалгалтын дүн харууллаа.