АН-ын Үндэсний зөвлөлдөх хороо өчигдөр орой хуралдлаа. Энэ хурлаар гурван асуудал хэлэлцсэн байна. Эхнийх нь парламентад суудалтай нам, эвсэлтэй Засгийн газар байгуулах асуудлаар зөвшилцөх УИХ дахь АН-ын бүлгийн ажлын хэсгийн мэдээллийг сонсчээ. УИХ-ын гишүүн М.Батчимэгээр ахлуулсан уг ажлын хэсгийн ажлын явцыг соноод МАН-тай хамтран Засгийн газар байгуулахаар болсныг ҮЗХ-ны гишүүд дэмжсэн аж. Шинэ Засгийн газрын бүтэц, бүрэлдэхүүний талаар энэ удаад хэлэлцээгүй гэнэ. Бүтэц, бүрэлдэхүүн ямар байхыг АН-ын Гүйцэтгэх зөвлөл шийдэх эрхтэй болж байгаа юм. Тэгэхээр ажлын хэсгүүдийн зөвшилцөл дуусаад Ч.Сайханбилэгийн Засгийн газар хэдэн гишүүн, ямар яамдтай байхыг заавал ҮЗХ-ны хуралдаанаар хэлэлцүүлэлгүй Гүйцэтгэх зөвлөл шийдэж, баталгаажуулна гэсэн үг.
Дараа нь ҮЗХ-ноос зарласан АН-ын ээлжит Их хурлыг хойшлуулжээ. Энэ сарын 8-нд товлоод байсан Их хурлыг тодорхойгүй хугацаагаар хойшлуулаад байгаа гэлээ. Уг нь намын даргыг өөрчилж, шинээр сонгох болон өөр бусад асуудал хэлэлцэхээр анх товлоод байсан Их хурал энэ ондоо болохгүй нь бололтой. Дараагийн удаа хуралдах ҮЗХ-гоор товоо тогтоохоор болжээ.