Дээрхийн гэгээн XIY Далай лам Энэтхэгийн дарамсалад монголын буддын шашинтнуудад зориулан дөрөв хоногийн айлдвар сургаалиа айлдаж дууссан байна. Тэрээр энэ дөрөв хоногт Ламрим ченмо буюу “Гэгээрлийн замд орох нь “ гэдэг сургаалиа  Драмсалагийн Же Чонкад хийдэд айлджээ. Түүний төвдөөр айлдсан сургаалийг монголоор орчуулан интернетээр шууд дамжуулсан байна.

Сургааль айлдахад 48 орны 4000 орчим сүсэгтэн хүрэлцэн очсоны 700 гаруй нь монголчууд байжээ. Дөрөвдэх өдрөө дээрхий гэгээнтэн зөвхөн монголын сүсэгтнүүдэд зориулан ном айлдсан гэнэ. XIY далай лам эцэст нь монголын сүсэгтнүүдэд  ирэх жил Монголд уулзах итгэлтэй байгаагаа хэлжээ.

Дээрхийн гэгээнтэн “Бид зөв төлөвшил олох ёстой. Энэ бол гэгээрэл олох эрх, боломж болно. Мөнгө хөрөнгө, амжилт, энэ насанд урт удаан амьдрах зэрэг хүсэл, шунал тачаалыг огоорох ёстой. Энэ бол зөв төлөвшил биш” гэж айлджээ.

Энэ сарын 12-ноос 14-нд Дээрхийн гэгээнтэн Ромд болох Нобелийн шагналтнуудын дэлхийн дээд уулзалтад оролцох юм байна. Эхлээд энэ уулзалт Өмнөд Африкийн бүгд найрамдах улсад болох байсан ч тус улсын эрх баригчид Төвдийн удирдагчийг хүлээн авахаас татгалзсанаар Италид болох болжээ.