Олгой хагаравч тогоон дотроо хэмээх үг бий. Ажил мэргэжлийн хувь тавилангаар нэг дор ажиллаж хамт олон болсон хүмүүст энэ үг илүү тусдаг. Тийм ч учраас МҮОНРТ-ийн уран бүтээлчид сүүлийн 10-аад жилд байгууллагынхаа болоод дарга нарынхаа хооронд үүсч байгаа элдэв хэл ам, маргаан муудалцаанд хүлээцтэй хандаж хамгийн шударга шүүх болох цаг хугацааны дэнсэнд найдан суусан билээ. Одоо эргээд харахад цаг хугацаа бидэнд ажилтныхаа төдийгүй мэдээллийн байгууллагын нэгэн гишүүнийхээ хувьд тааруухан хандлага гаргаж, үнэн худал хоёрыг төөрөгдүүлэхэд өөрсдөө санамсаргүй оролцож байжээ гэх шиг санагдах боллоо. Өнгөрсөн даваа гаригийн хурал дээр огт бодоогүй байсан нэгэн үйл явдал болсон юм.
Байгаа байхгүй нь бараг мэдэгдэхгүй байсан М.Наранбаатар дарга нилээд баргар царайтай орж ирээд “сэтгэл санаа таагүй байна. Та нарын төлөө би дандаа буян хийж явсан” гээд учир нь ойлгогдохгүй баахан зүйл ярьсан.Түүний яриан дотор уран бүтээлчид бидний сэтгэлийг эмзэглүүлсэн нэгэн зүйл байсан нь МҮОНРТ-ийн алтан сан хөмрөгийг нэгэн хувийн компанид гэрээ байгуулан олгож, цаашид бүрэн ашиглуулах тухай асуудал байлаа. Нэг бол тэднээр юмаа хийлгээд гэрээгээ өөрчилж болно ч гэх шиг их л сонин тайлбар өгсөн . Тэгээд энэ байгууллагын төлөө яваад байхад та нар АТГ-т намайг өгнө гэсэн байна. Аудитын шалгалт ч өчнөөн хийлгэсэн.Тэгээд юу ч гардаггүй биз дээ.
Одоо ч бас шалгаж байгаа. Би дандаа сайн зүйл хийсэн болохоор юу ч гарахгүй гээд толгой эргэм олон зүйл ярьсан. Харин дараа нь МҮОНТ-ийн захирал Д.Энхтуяа нэгэн тайлбар хийсэн юм. Тэрээр энэ хүний хууль бус ажил, ёс зүйгүй байдалд арга хэмжээ авч өгнө үү гээд үндэсний зөвлөлд гурван ч удаа өргөдөл гаргасан тухайгаа танилцуулахад түүний тайлбарт бүх уран бүтээлчдийн өмч болсон алтан фондны талаар хийсэн хууль бус гэрээнд гарын үсэг зурахыг тулгасан тухай ярилаа. Энэ мэдээлэл нийт уран бүтээлчдийг бүр гайхшруулж орхисон юм. Учир нь МҮОНРТ-ийн алтан сан хөмрөг гэдэг нэгэн даргын мэдлийн асуудал биш билээ.
МҮОНРТ-ийн архивын алтан сан хөмрөг нь Монгол Улсын архивын салшгүй нэгэн хэсэг бөгөөд төрийн өмч мөн гэж олон нийтийн радио телевизийн хуулиндаа ч заасан байдаг.
Нөгөөтэйгүүр монголын ард түмний бүтэн тавин жилийн туулсан замнал бүтээсэн түүх энд бий. Монгол Улсад ганцхан телевиз байсан тэр л үеэс Монголын түүхийг бичих үйлсэд зүтгэсэн эгэл ард түмний он цагийг хэрхэн туулж өнгөрснийг батлах түүхэн баримтууд юм. Ийм ч учраас МҮОНРТ-ийн алтан сан хөмрөгийг Монгол улсын архивын нэгэн салшгүй хэсэг гэж үздэг. Гэтэл үүнийг дангаар захиран зарцуулах эрхийг эдлэн ажилтан албан хаагчдад ч мэдээлэл хүргэхгүйгээр гадагш гарган Ви-Эс- Эм ХХК-д шилжүүлэн “онлайн” худалдаа хийлгэх бүрэн эрхийг олгосон тухай мэдлээ. Энэ компанитай байгуулсан гэрээг нь Д.Энхтуяа үндэсний зөвлөлд өргөдөл гарган түр зогсоолгосон тухай сонсоод арай ч хэтэрч байгааг харлаа.
М.Наранбаатар энэ үеэр МҮОНРТ-ийн архивын сан хөмрөгийг зарж борлуулах нь хуульд нийцсэн, хориглосон зүйлгүй мэтээр ярьж тэртэй тэргүй зарахаас өмнө гадагшаа гарчихсан архив биз дээ гэх мэтээр биднийг ятгах төөрөгдүүлэх маягтай өөрийгөө өмгөөлөн баахан ярьсан нь өөрийнхөө дор ажиллаж байгаа бүх ажилтан уран бүтээлчдийг хуурч болдог гэж хэтэрхий бат ойлгосон юм шиг санагдана. М.Наранбаатарын энэхүү үйлдэл нь Төрийн өмчөөс олон нийтийн өмчид эд хөрөнгө шилжүүлэх тухай хуулийн 1 дүгээр зүйл “... дахин дамжуулах техник станц болон үндэсний радио, телевизийн архивыг төрийн өмчид хэвээр үлдээсүгэй” мөн бидний өнөөдрийг хүртэл мөрдөн байгаа Олон нийтийн радио телевизийн тухай хуулийн 10 дугаар зүйлийн 10.2 дахь хэсэгт “Олон нийтийн радио,телевизийн архив Үндэсний төв архивын салбар ... Архивын тухай хуулиар зохицуулна “ гэж тус тус заасныг зөрчиж байгаад бид дургуй байна. Хамгийн гол нь “МҮОНРТ-ийн ажиллагсдын ёс зүйн дүрмийн нэгдүгээр зүйлийн 1,2 дахь заалт”... Ажилтан бүр ажил үүргээ гүйцэтгэхдээ иргэний эрхийг хүндэтгэх, бодит мэдээлэл олж авах, ил тод байдлыг эрхэмлэх, шударга ёсыг баримтлан өндөр ёс суртахуунтай байна.” Мөн хоёр дугаар зүйлийн 2,5 дахь хэсэгт”... Ажилтан бүр бусад ажилтны нэр хүндийг хүндэтгэж тэдний нэр төрийг гутаан доромжлох эрхгүй” гэсэн заалтыг тус тус зөрчиж байгаа төдийгүй хамт олноо хүндэтгэхгүй байгаагийн илрэл гэж бид үзэж байна.
М.Наранбаатар МҮОНРТ-ийн ерөнхий захирлаар ажиллах энэ хугацаанд телевизийн захирлаар нийт зургаан хүн ажиллаж байсан бөгөөд тэд бүгд хар хэрээ болон халагдаж, харин М.Наранбаатар ганцаараа зөв хүн болон үлддэг уламжлал нэгэнт тогтсон нь харамсалтай. Одоо Батбаяр, Энхтуяа нар тэдний араас халагдаж байх шиг. Бидэнд дарга цэргийн хэн нь хэнийгээ халах нь хамаагүй юмаа гэхэд МҮОНТ-ийг элгээр нь хэвтүүлж, олны дунд нэр хүндийг нь унаган уран бүтээлчдийг муухай харагдуулж байгаад туйлын харамсч байна. Би эндээс яасан ч явахгүй харж байгаарай гээд л бидэнд баахан ярьсан М. Наранбаатараас бид харин одоо жигшиж байна.
Нэг тогоон дотор ажиллаж байсны хувьд цаг хугацаатай албаа нэртэйхэн шиг өндөрлөөд өөрөө өргөдөл өгөөд яваасай гэж хүлээсэндээ ийм олон алдааг уужуу харж суусандаа уран бүтээлчид харамсч байна.