“Улаанбаатар төмөр зам” нийгэмлэгийн Ерөнхий хорооны ээлжит хуралдаан өнгөрсөн пүрэв, баасан гаригт болж, “УБТЗ”-ын даргаар Лувсандагвын Пүрэвбаатарыг томиллоо. Л.Пүрэвбаатарын хувьд 1984 онд Ленинградын Төмөр замын инженерийн дээд сургуулийг Зам харилцааны мэргэжилтэн, дохиолол холбооны инженерээр төгсч ирээд өнөөдрийг хүртэл төмөр замтай амьдралаа холбож буй инженерүүдийн нэг юм. Түүний ажлын гараа 1984-1989 онд Дархан дахь Төмөр замын дохиолол холбооны I ангид инженерээс эхэлжээ. Улмаар 1990-1993 онд тус байгууллагын ерөнхий менежер, 1994-1996 онд Төмөр замын Хэрэг эрхлэх газрын Олон улсын төслийн мэргэжилтэн, 1997-1999 онд тус газрын Техник эдийн засгийн албаны ахлах инженер, 1999-2000 онд Төмөр замын Аялал жуулчлал, хамтын ажиллагааны төвийн захирлаар томилогдон ажиллаж байжээ.
Тэрээр “Мастернэт” компанийн захирлаар 2000-2004 онд ажиллаж, “УБТЗ”-ын Нэгдүгээр орлогч даргаар 2004-2006, Зүтгүүр, хөдлөх бүрэлдэх, туслах үйлдвэрлэл эрхэлсэн орлогч даргаар 2006-2007, УБТЗ-ын Гадаад харилцааны албаны даргаар 2008-2012, Засгийн газрын хэрэгжүүлэгч агентлаг Төмөр замын газрын дэд даргаар 2008-2012 оныг дуустал ажилласан туршлагатай. Тус агентлагийг татан буулгасны дараагаас буюу 2012 оны аравдугаар сараас Монголын төмөр замын инженерүүдийн холбооны тэргүүнээр сонгогдон ажиллажээ. Төрийн алба тэр дундаа төмөр замын салбарт олон жил ажилласан Л.Пүрэвбаатар ийнхүү “УБТЗ”-ын даргаар томилогдлоо. Удирдлагын арга зүй, хүний нөөцийн менежерээр мэргэшсэн түүнийг “УБТЗ”-ын даргаар томилогдсонд салбарынхан нь ам сайтай хүлээн авчээ.