Дэлхийн хамгийн том хайлтын систем “Google” жил бүрийн эцэст тухайн онд ямар мэдээлэл хамгийн эрэлттэй нь байсныг тодруулдаг. Энэ жилийн хувьд дэлхий нийтийн хайрлаж хүндэтгэдэг жүжигчин Робин Уиллиамсыг нас барсны дараа түүний нэрээр хамгийн их хайлт хийжээ. Өнгөрсөн зун хорвоог гэнэтхэн орхисон жүжигчний тухай мэдээллийг дэлхий даяар хэдэн зуун сая хүн хайж, яагаад амиа хорлох болсон, түүний амьдралд чухам юу болсныг мэдэх гэж оролджээ.
Робин Уиллиамсын дараа мэдээж өнгөрсөн зун болсон хөлбөмбөгийн дэлхийн аварга шалгаруулах тэмцээний тухай мэдээллийг хамгийн их хайсан байна. Энэ мэтчилэн дэлхий дахины анхаарлыг татсан Эбола халдварт өвчин, Малайзын онгоцны сүйрэл, нэг хэсэг интернэтийг байлдан дагуулсан “Ice Bucket Challenge”, Исламын улс бүлэглэл, Сочигийн олимп, “Frozen” хүүхэлдэйн киноны тухай мэдээллийг хамгийн их “google”-дсэн байна.