Сонгинохайрхан дүүргийн IX хороонд оршин суух, 45 настай эрэгтэй Э нь тунгалаг наалдамхай хальсаар битүү ороож боосон 60х47х58см хэмжээтэй эртний хүний занданшуулсан цогцос нууж байсныг иргэний дуудлагын дагуу Цагдаагийн газрынхан шалгаж, шарилыг олсноор эд мөрийн баримтаар хураан авсан нь өнгөрсөн долоо хоногийн анхаарал татсан үйл явдал байлаа. Өнөөдрийн байдлаар Зохион байгуулалттай гэмт хэрэгтэй тэмцэх тасгийнхан  дээрх шарилыг Шүүхийн шинжилгээний үндэсний төвд хүлээлгэн өгч, шалгалтыг үргэлжлүүлж байгаа юм.

Харин өнгөрсөн баасан гарагт ЦЕГ-ын Хэвлэл мэдээллийн төвөөс дээрх занданшуулсан шарилын талаар мэдээлэл өгч, “Шарилын талаар гараад байгаа мэдээллүүдийн аль нь ч батлагдаагүй учраас худал мэдээлэл тараахгүй байхыг хүсье” гэдгийг хэлсэн юм. Тэд шарил 200 гаруй жилийн настай болон хууль бусаар хил давуулан худалдаалах гэж байсан зэрэг мэдээллийг нягталж байгаа учраас албаны байгууллагуудын дүгнэлт гартал мэдээллийг дэвэргэхгүй байх ёстой гэж үзэж байна.

Харин Бурханч лам Г.Пүрэвбат “Уг шарил нь очир завилгаар суулган, зүүн мутрыг тэгш, баруун мутрыг цээжиндээ ном номлохын сутартайгаар зохих журмын дагуу сайтар занданшуулсан шарил” гэж эхний ээлжид дүгнэсэн юм. Тэгвэл эрт үед хутагт, дээдсийг занданшуулахдаа л дээрх байдлаар занданшуулдаг байжээ.