Манай улс аялал жуулчлалын өрсөлдөх чадварын үзүүлэлтээр дэлхийн 140 орноос 99-д, Ази Номхон далайн 25 орноос 19-д эрэмбэлэгдэж байна. 2013 онд Монгол Улсад 417 мянга гаруй жуулчин аялж, энэ салбарын орлого 263 сая ам.долларт хүрч, дотоодын нийт бүтээгдэхүүний 5,29 хувийг бүрдүүлжээ. 

Аялал жуулчлалын салбарын хөгжлийг хязгаарлаж буй саад тээгийг арилгаж олон улсад өрсөлдөх чадварыг дээшлүүлснээр 2020 онд гэхэд ДНБ-ий 14 орчим хувийг бүрдүүлэх зорилт тавьж байна. Энэ салбарын хөгжлийг эрчимжүүлэх, валютын урсгалыг нэмэгдүүлэх чиглэлээр казиногийн үйл ажиллагааг үүсгэн, цаашид хөгжүүлэх шаардлагатай.

Уг хэрэгцээ шаардлагыг үндэслэн Казиногийн тухай хуулийн төслийг боловсруулсан байна.
Хуулийн төсөлд Монгол Улсын нутаг дэвсгэр дээр казиногийн үйл ажиллагаа эрхлэх болзол, казино болон тусгай зөвшөөрөл эзэмшигчдэд хориглох болон бусад үйл ажиллагаатай холбоотой төрийн зохицуулалт, бүрэн эрх, хяналтын тогтолцоог бий болгохтой холбогдсон харилцааг тусгажээ.