УИХ дахь Ардчилсан намын бүлэг даваа гарагт болсон ээлжит хурлынхаа талаар мэдээлэл өглөө. Таван толгой төслийн талаар УИХ-ын нэр бүхий 16 гишүүн Монгол Улсын сайд М.Энхсайханд тавьсан асуулгын хариуг сонссон байна. Мөн УИХ-ын гишүүн Л.Эрдэнэчимэгийн өргөн мэ­дүүлсэн Согтууруулах ун­даа­ны хяналтын тухай хуу­лийн төслийг буцаан татахаар бол­­жээ. Удахгүй Засгийн газ­раас УИХ-д “Архидан согтуу­рахтай тэмцэх үндэсний хө­төлбөр”-ийг өргөн барих гэж байгаа учир хуулийн төсөл санаачлагчтай ярилцаад хөтөлбөр баталсны дараа төс­лийг хэлэлцүүлэхээр шийд­сэн аж. Үүнээс гадна АН-аас томилогдсон сайд нар ха­лаа сэлгээ хийгээгүйгээ хэл­сэн байна. Тухайлбал, Аж үйлд­вэрийн яам, Уул уур­хайн яам, Гадаад хэргийн яам, Хүнс, хөдөө аж ахуйн яа­манд өнөөдрийн байдлаар халаа сэлгээ хийгээгүй гэжээ. Бүлгийн хурлаар АН-ын 2015 оны үйл ажиллагааны төлөвлөгөөтэй танилцаж, Өрийн удирдлагын тухай хууль, “Урт нэртэй” хуулийг дагаж мөрдөх журмын тухай хуулийн өөрчлөлт, Эдийн засгийн өршөөлийн тухай, Эдийн засгийн ил тод байдлын тухай хуулийг яаралтай батлуулах талаа санал солилцсон гэлээ.

АН-ын бүлгийн дэд дарга С.Одонтуяа ““Урт нэртэй” хуулийг цуцалмааргүй байна гэсэн мессэж гар утсанд их ирж байна. “Урт нэртэй” хуулийг цуцлах талаар УИХ болон АН-ын бүлэг дээр огт яриагүй. Уг хуулийг дагаж мөрдөх журмын тухай хуульд нэмэлт өөрчлөлт оруулсантай холбогдон ажлын хэсэг байгуулагдаад, хоёр дахь жилдээ ажиллаж байна. Гэхдээ энэ хуулийг хэрэгжүүлэх явцад маш олон алдаа, завхрал, нугалаа гарсан. Жишээлбэл, Усны тухай хуулиар гол, усны эхээс 200 метр зайд хайгуул, олборлолт явуулна гэсэн байхад тухайн орон нутаг нь 300м, 400м, тэр ч бүү хэл 10 мянган метр гээд дур зоргоороо хэмжээ заачихдаг. Үүнээс үүдэж, маш олон аж ахуйн нэгжийн үйл ажиллагаа зогсонги байдалд орж, улмаар дампуурлын ирмэгт хүрсэн. Д.Арвин гишүүнээр ахлуулсан ажлын хэсэг хоёр жилийн хугацаанд орд болгонтой нэг бүрчлэн танилцсан. Эндээс маш их сөрөг үр дагавар гарч байна гэсэн дүгнэлт гаргасан учир уг хуулийг дагаж мөрдөх журмын тухай хуульд өөрчлөлт оруулахаар хэлэлцэж байгаа юм” гэлээ.

Тус бүлгийн дарга Б.Гарамгайбаатар сэтгүүлчдийн асуултад хариулсан юм.  

-Таван толгойн асууд­лаар ямар мэдээлэл авсан юм бол?
-Монгол талын 51 ху­вийг эзэмшиж байгаа ММС компанийн дотоод бүтэц, зохион байгуулалтын асууд­лыг гишүүд илүүтэй сонирх­сон. Энэ талаар ажлын хэсэг тодорхой мэдээлэл өглөө. Төмөр замын асуудал дээр маргаан бий. Үндсэн суурь дэд бүтэц нь төрийн мэдэлд байх уу, хувийн хэвшлийн мэдэлд байх уу гэдэгт гишүүд санал бодлоо илэрхийлж бай­гаа. Бусад асуудалд гишүүд нэгдмэл байр суурьтай байгаа.

-АН-ын сайд нар төрийн албанд халаа сэлгээ явуулаагүй гэсэн үү?
-Намууд хамтарч Засгийн газар байгуулахдаа тодорхой зөвшилцөлд хүрсэн. Энэ зөвшилцлийн хүрээнд яамдад халаа сэлгээ хийхгүй байх тухай зөвлөмж өгсөн юм. Зөвлөмжийг хэрэгжүүлж байгаа эсэх талаар л гишүүд асуулт асуусан. Янз бүрийн яриа, маргаан байгаа учраас энэ асуудлыг нэг мөр болгох үүднээс ажиллаж байна.

-Эдийн засгийн өршөө­лийн тухай, Эдийн засгийн ил тод байдлын тухай хуу­лийн төсөлд татварын өртэй компаниудыг өршөөнө гэсэн заалт байхгүй. Гэтэл зарим гишүүн өршөөнө гээд байгаа?
-Өчигдрийн /уржигдар/ хурал­даанаар  энэ асуудлыг яриагүй. Гэхдээ өмнө нь ярилц­сан. Уг хуулиар өртэй компа­ниудыг өршөөх гээд байна гэсэн хардлага гишүү­дийн дунд бий. Тийм асуудал байхгүй.

-Засгийн газрын мөрийн хөтөлбөр нь намуудын нэгдсэн мөрийн хөтөлбөр байх уу?
-Засгийн газарт орсон намууд өөр өөрсдийн зүгээс тодорхой төсөл, арга хэмжээг хэрэг­жүүлэх саналуудаа гар­гаж өгнө. Тэдгээр саналыг Зас­гийн газар нэгтгэн, гадна дотны санхүүгийн байгуул­лагууд, зөвлөгөө өгдөг байгууллагуудтай ярилцаж байгаад, нэгдсэн төлөвлөлт гаргах юм. Үүний дагуу Засгийн газар төлөвлөгөөгөө боловсруулаад, танилцуулна. МАН 15 чиглэл бүхий төлөвлөгөө өгсөн гэсэн.