УИХ-ын намрын ээлжит чуулган ирэх долоо хоногт хаалтаа хийнэ.

Намрын чуулган холбогдох хуулиараа бол энэ сарын 10-нд завсарлах учиртай. Гэхдээ УИХ-ын дарга захирамж болгосны дагуу энэ сарын 18-нд буюу 8 хоногоор хуралдааныг сунгаж, цагаан сарын битүүний өдөр завсарлахаар болсон юм. Иймд УИХ-ын даргын дэргэдэх зөвлөл ирэх долоо хоногт хэлэлцэх хууль тогтоомжийн хуваарийг энэ долоо хоногтоо амжиж гаргасан байна. Даваа гарагт УИХ дахь нам эвслийн бүлэг болон ажлын хэсэг хуралдана. Харин мягмар болон лхагва гарагт байнгын хороо болон дэд хороод хуралдах ба үдээс хойш нь чуулган хуралдах хуваарь гарчээ. Тэдгээр хуралдаанаар Эдийн засгийн түншлэлийн тухай Монгол Улс, Япон улс хоорондын хэлэлцээрийг соёрхон батлах тухай, Засгийн газарт чиглэл өгөх тухай, Гацууртын ордын төрийн эзэмшлийн хувь тогтоох тухай, Эдийн засгийн хүндрэлийг даван туулах арга хэмжээний тухай, Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хуульд нэмэлт, өөрчлөлт оруулах тухай, Ашигт малтмалын тухай хуульд нэмэлт оруулах тухай, Засгийн газрын гишүүнийг огцруулах тухай зэрэг асуудлыг хэлэлцэхээр товложээ.