МУГЖ, дуучин С.Жавхлан төрийн гурван өндөрлөг болон УИХ-ын гишүүдийг халз мэтгэлцээнд дуудсан. Тэрбээр МҮОНТ-ээр олон нийтийн өмнө тэдэнтэй нээлттэй ярилцахаар цаг хүссэнийг тус телевизийн удирдлага хүлээн авч маргааш 21 цагт цаг гаргаж өгчээ.

Дуучин маань өчигдөр орой энэ тухайгаа УИХ-ын гишүүн Г.Уянгад хэлж, түүнийг уг мэтгэлцээнд оролцохыг урьсан байна. УИХ-ын гишүүн Г.Уянга энэ талаар олон нийтийн сүлжээгээр бичихдээ "Намайг оролцоно биз дээ гэж байна. Дэмжүүштэй сайхан санал байна. Би ч яахав, оролцож болно. Харин хэдэн хүн ирэх юм бол доо? Харганын ноосыг нэг өдрийн дотор цуглуулж эсгий хийхээр оролдоод үзэх үү? Бид ийм ярилцлагыг зөндөө хүсч байсан. Ирдэг хүн гэж нэг ч байгаагүй. Харин сүүлийн үед зурагтаар 25 жилийн өмнөх тэмцлийн үеийн дүрс бичлэг гарч байна билээ. Өнөөдрийн эрх баригчдыг гудамжны тэмцэгч байхад тэр үеийн эрх баригчид, Ерөнхий сайд нь хүрч ирээд л олон нийтийнхээ өмнө зурагтаар ярилцаж байсан байна билээ. Одоо ийм хүнийг өдрөөр дэн бариад хайсан ч олохгүй биз дээ. Миний бие төр, засгийн удирдлагыг ийм ярилцлагад олонтаа урин дуудаж байсны хувьд, олон нийтийн хөдөлгөөний тэргүүн эгнээнд байсны хувьд, өнөөдрийн нийгмийн системд ихээхэн шүүмжлэлтэй хандаж, олон нийтийн оролцоотой, тайван замын Үндсэн хуулийн хувьсгалд уриалж байгаагийнхаа хувьд, МҮОНРТ энэхүү ярилцлагыг хүндэтгэн үзэж цаг гаргаж өгсөн тул энэ ярилцлагад очих болно" гэжээ.