Барилга угсралтын ажлын явцад зөрчил гарч барилгын бат бэх, тогтвортой байдал алдагдах, техникийн ашиглалтын аюулгүй байдлыг хангаагүйгээс хүний эрүүл мэнд, амь насыг хохироох зэргээс шалтгаалан тухайн барилгын ажлыг зогсоох, хэсэгчлэн болон бүтнээр буулгах шаардлага тулгарах гэхчлэн болзошгүй эрсдлээс хүний амь нас, аж ахуйн нэгжүүдийг хамгаалах зорилгоор МХЕГ-аас зөвлөмж гаргалаа.

Зөвлөмжинд компани өөрийн дотоод хяналтын журмыг боловсруулж, хэрэгжүүлэх, бетон цутгалтын ажлыг тэг хэмээс бага үед нэмэлт арга хэмжээгүйгээр гүйцэтгэхгүй байх, үндсэн бүтээцийн зуурмагыг төвлөрсөн зуурмагийн узелээс авч хэрэглэх, Хөдөлмөрийн тухай хууль зааснаар орон сууцны бүс нутагт оройн 22 цагаас өглөөний 06 цагуудад барилга угсралтын ажил явуулахгүй байх, ХАБЭА хариуцсан ажилтныг тогтмол ажиллуулж, ажилчдыг сургалтад хамруулах зэрэг асуудлыг тусгасан байна.