Хятадын баруун хойд Шинжаан нутгийн Тэнгэр ууланд амьдардаг, хулсны баавгайгаас ч ховор нэг зүйлийн амьтан байгаль хамгаалагчдын анхаарлыг татаж эхэллээ. Энэ бол тоо толгой нь мянга хүрэхгүй ховордчихоод байгаа Или Пика гэдэг туулай юм. 1983 онд анх олж илрүүлсэн пика хэмээх энэ туулайг тухайн газрынх нь нэрээр Или гэж нэрлэсэн аж.  Хүн амьтны нүдэнд маш ховор өртдөг энэ туулайн гэрэл зургийг 1990-ээд оноос хойш өнгөрсөн долдугаар сард анх удаа авчээ. Анх ийм амьтан байдгийг илрүүлснээс хойш пика туулайн тоо толгой бараг 70 хувиар хорогдоод байгаа аж.
2008 онд пика туулайг устах аюултай нэн ховордож буй амьтны тоонд оруулан бүртгэсэн боловч түүнийг хамгаалах, судлах тухайд албан ёсоор ажиллаж буй ямар ч байгууллага, судалгааны баг энэ хооронд гарч ирээгүй гэнэ.

Ердөө 20 см урттай энэ бяцхан туулай өндөрлөг газрын хад асган дээр амьдардаг бөгөөд сүүлийн жилүүдэд дэлхийн дулаарлаас болж уулсын цас хайлах тусам дээшээ мацах болсон нь тоо толгой нь огцом буурахад нөлөөлжээ. Анх Или Пикаг олж илрүүлэхэд 3200-3400 метрийн өндөрт амьдардаг байсан бол одоо бүр 4100 метр рүү гарсан байна. Ганц, ганцаараа амьдардаг онцлогтой болохоор араатан амьтны олз боллоо гээд бусаддаа сэрэмжлүүлэх аргагүй байдаг гэнэ.