Манай орны иргэд ихээр зорчдог БНСУ-д коронавируст халдвар /MERS-CoV/ бүртгэгдэж, одоогийн байдлаар 15 хүн өвчилж, лабораторийн шинжилгээгээр батлагджээ.

 Коронавируст халдвар нь амьсгалын замаар дамждаг, хүнд явцтай, нас баралт өндөртэй, шинэ халдварт өвчин юм.

 Анх өвчилсөн өвчтөн нь Арабын Нэгдсэн Эмират улс, Саудын Араб, Катар улсаар аялжээ. Одоогийн байдлаар түүний эхнэр, хүүхэд, эмнэлэгт хамт хэвтэж байсан өвчтнүүд халдварлажээ.

Иймд коронавируст халдвараас сэргийлэхийн тулд онцын шаардлагагүй бол тус улсад зорчихгүй байх, гараа сайтар савандаж угаах, түүхий сүү, хагас боловсруулсан бүтээгдэхүүн хэрэглэхгүй байх, биеийн эсэргүүцэл сайжруулах, илчлэг сайтай хоол, хүнс хэрэглэх, зэрлэг амьтадтай харьцахгүй байх, амьтны захаар явахгүй байх, халуурах, ханиалгах, амьсгалахад төвөгтэй болох зэрэг шинж тэмдэг илэрвэл эмнэлэгт яаралтай хандахыг ЭМСЯ, Шуурхай удирдлагын төвөөс зөвлөж байна.