Монголын Залуучуудын Холбооны дэргэдэх Монголын Авто Замчин Залуучуудын Холбоо нь БНСУ-ын Younglim корпорацитай 2020 он хүртэл хамтран ажиллахаар болсон билээ.

Хамтын ажиллагааны хүрээнд гэрэлтүүлгийн стандарт норм дүрмийг шинэчлэн боловсруулах, Монголчууд өөрсдөө замын гэрэлтүүлгийг үйлдвэрлэдэг болохоос гадна Улаанбаатар хотод сүүлийн үеийн авто замын гэрэлтүүлгийн шинэ техник технологийг нэвтрүүлэхээр болсон юм. Энэхүү ажил эхнээсээ хэрэгжиж, хотын зарим гудамж талбайг БНСУ-ын 24 жилийн түүхтэй Younglim корпорацийн гэрэлтүүлгүүд чимж эхлээд байна. Монголын Авто Замчин Залуучуудын Холбооны залуус эхний удаад Нисэх-Яармагийн чиглэлийн замын гэрэлтүүлгийг шинэчлэн сольсон бөгөөд тус ажилтай Зам, тээврийн сайд М.Зоригт өөрийн биеэр танилцжээ. Энэ үеэр уг гэрэлтүүлгийг шаардлагатай гэж үзэн АСЕAМ-д бэлтгэх ажлын хэсгийн дэд хороог ахлаж байгаагийн үүднээс ажлын хэсгийн ээлжит хурал дээр замын үлдсэн хэсэг болон Богд уулын арын замд тавьж болох юм гэдэг саналыг гаргасан байна. Шинээр сольсон тус гэрэл нь эрчим хүч бага зарцуулдаг, цахилгааны хүчдэлээс шалтгаалж шатдаггүй, жигд гэрэлтүүлэгтэй гэхчлэн олон давуу талтай аж.