Монгол Улсад Нотариатын байгууллага үүсч хөгжсөний 90 жилийн ойг тохиолдуулан нотариатчид Та бүхэнд Монгол Улсын Их Хурлын нэрийн өмнөөс болон хувиасаа  мэндчилгээ дэвшүүлье.  

Нотариатын байгууллагын үндэс суурь Монгол Улсад анх 1925 онд Шүүх явдлын яамны Ерөнхий хэлтсийн харъяанд “Гэрээ зэргийг гэрчлэн батлах хэргийг эрхлэх салаа” нэртэйгээр байгуулагдаж байжээ. Монгол Улсын 1992 оны Үндсэн хуулийн үзэл баримтлал, эрх зүйн шинэтгэлийн хүрээнд 1997 онд Нотариатын тухай хуулийг шинэчлэн баталснаар төр зарим чиг үүргээ төрийн бус мэргэжлийн эрх олгогдсон хуульчдаар гүйцэтгүүлэх болсон.

Төрөөс газар, орон сууцыг хувьчлах, түүнийг бүртгэх үйл явцыг нотариатын эрх зүйн үйлчилгээний оролцоотойгоор хууль зүйн баталгааг хангаж, Монгол Улс үл хөдлөх эд хөрөнгөө бүртгэж, бүртгэлийг зохих түвшинд хүргэхэд нотариач Та бүхэн чухал хувь нэмэр оруулсан.

Өнөөдөр Нотариатын байгууллага нь чадварлаг мэргэшсэн хуульчдыг эгнээндээ нэгтгэсэн, нийгмийн харилцаанд тодорхой байр суурийг эзэлсэн, Олон Улсын Нотариатын холбоонд гишүүнээр элсэж тогтвортой, бие даасан байгууллага болтлоо хөгжин бэхжсэн байна.

Монгол Улсын Их Хурал Үл хөдлөх эд хөрөнгийн барьцааны тухай хуульд нэмэлт, өөрчлөлт оруулах тухай хуулийг баталж, газар, үл хөдлөх эд хөрөнгийг эдийн засгийн эргэлтэд оруулах, барьцаалах, барьцааны үүргийн гүйцэтгэлийг хангах, хууль зүйн баталгааг нотариатын эрх зүйн үйлчилгээгээр хангах зохицуулалтыг хуульчилсан нь төрөөс нотариатад хүлээлгэж буй итгэл. Төрийн энэ итгэлийг та бүхэн баталж, хариуцлагатай, зүтгэлтэй ажиллахыг хүсэж байна. Улс орны хөгжил дэвшил, нийгэм, эдийн засгийн өөрчлөлттэй уялдуулан Та бүхэн мэргэжлийн ур чадвараа тогтмол дээшлүүлэх, хуульчийн ёс зүй, хариуцлагатай байдлыг ханган ажиллах зүй ёсны шаардлага тавигдаж байгааг онцлон тэмдэглэж байна.

"Үнэний гэрч" болсон Та бүхэн нотариатч гэх эрхэм үүргийг хараат бусаар хэрэгжүүлж,  чин шударга, өндөр ёс зүйтэй ажиллаж Нотариатын байгууллагын нэр хүндийг өндөрт өргөж явна гэдэгт итгэлтэй байна.

Монгол Улсад Нотариатын байгууллага үүсч хөгжсөний 90 жилийн ойг тохиолдуулан Та бүхэнд дахин баяр хүргэж, хүний эрхийг хамгаалах, хууль тогтоомжийг сахин биелүүлэх үйлсэд тань улам их амжилт хүсч, сайн сайхан бүхнийг хүсэн ерөөе.