Засгийн газрын хэрэг эрхлэх газрын дарга С.Баярцогтод хариуцлага тооцуулах тухай бичиг Ерөнхий сайд Ч.Сайханбилэгт Өргөдлийн байнгын хорооноос өгчээ. Тус Байнгын хороонд өнгөрсөн аравдугаар сард 380 иргэн төрийн албанаас үндэслэлгүй чөлөөлөгдсөн, халагдсан тухай гомдлоо ирүүлсэн байна. Түүнээс гадна Шилэн дансны тухай хуулийг хэрэгжүүлэхгүй байгаа гэсэн гомдол удаа дараа иржээ.

Үүний мөрөөр ЗГХЭГ-ын дарга С.Баярцогтод зөрчлөө арилгасан талаархи тайлангаа аравдугаар сарын 29-ний дотор ирүүлэх албан бичиг явуулж. Аравдугаар сарын 27-ны өдөр албан бичгээ хүргүүлж, тайланг Өргөдлийн байнгын хорооны хуралдаанаар хэлэлцэхээр төлөвлөсөн байна. Харин ЗГХЭГ-аас хариу өгөхдөө 2014 оны арванхоёрдугаар сарын 10-ны өдрөөс хойш хууль бусаар ажлаас халагдсан албан хаагч байхгүй, бусад яамнаас чөлөөлөгдсөн хүмүүсийн талаар мэдэхгүй. Шилэн дансны хуулийн хэрэгжилтийн талаар Ерөнхий сайд энэ баасан гарагт УИХ-д мэдээлэл хийх тул тэр үед мэдээлэлтэй танилц гэж Өргөдлийн байнгын хороонд өгсөн байна.

Иймээс Байнгын хороо Засгийн газрын гишүүдийн тайланг хуралдаанаар хэлэлцэх тухай хуулийн заалтыг биелүүлэн ажиллахыг шаардаж, Ерөнхий сайдыг хариуцлага тооцохыг хүссэн аж.