Монгол Улсад 1991-2014 оны хооронд үндэсний, салбарын болон салбар хоорондын түвшинд урт, дунд, богино хугацаанд хэрэгжүүлэх нийт 480 гаруй бодлогын баримт бичиг батлагдсанаас өнөөгийн байдлаар 290 гаруй нь хөтөлбөрийн хугацаа дуусаагүй хэрэгжиж байгаа юм байна. Гэхдээ Засгийн газар “Бодлогын баримт бичгүүдийн хэрэгжих хугацаа, зорилго, зорилт, хэрэгжүүлэх арга хэмжээ давхацсан, хоорондын уялдаа сул байгаагаас хэрэгжилт нь зорьсон үр дүнд хүрэхгүй байна” гэж үзсэн байна. Тиймээс Хөгжлийн бодлого төлөвлөлтийн тухай хуулийн төслийг боловсруулаад байгаа юм.

Харин өчигдөр УИХ-ын Эдийн засгийн болон Төрийн байгуулалтын байнгын хороо дээрх хуулийн төслийн анхны хэлэлцүүлгийг хийлээ. Ингээд ажлын хэсгээс, “Засаг даргын үйл ажиллагааны хөтөлбөрт Засаг даргын бүрэн эрхэд үл хамаарах асуудал болон хөрөнгийн эх үүсвэр тодорхойгүй, үндэслэлгүй зорилт, арга хэмжээг тусгахыг хориглоно”, “Монгол Улсын Ерөнхийлөгчийн, УИХ-ын болон орон нутгийн сонгуулийн үр дүн нь урт болон дунд хугацааны хөгжлийн бодлогын баримт бичигт нэмэлт, өөрчлөлт оруулах үндэслэл болохгүй” гэсэн заалтуудыг хуулийн төслөөс хасах санал оруулсныг гишүүдийн олонх дэмжсэнгүй. Харин Хөгжлийн бодлого төлөвлөлтийн тухай хууль батлагдсантай холбогдуулж УИХ-ын тогтоолын төсөл боловсруулж батлуулах санал дэмжигдлээ. Хуулийн төслийг хамтарсан хуралдаанаар ийнхүү хэлэлцээд чуулганы нэгдсэн хуралдаанд танилцуулахаар тогтлоо.