УИХ-ын чуулганы өнөөдрийн /арванхоёрдугаар сарын 3-ны/ үдээс хойшхи хуралдаанаар Хүн амын хөгжил, нийгэм хамгааллын сайд С.Эрдэнэ УИХ-ын гишүүн С.Одонтуяа, Ж.Батзандан нарын гишүүдийн өргөн барьсан  Хамтын тэтгэврийн тухай хуулийг хэлэлцээд  санал хурааж баталлаа.

2014 оны нэгдүгээр сарын 1-нд УИХ-д өргөн мэдүүлсэн энэ хуулиар хамтран амьдарч байсан тэтгэврийн насны гэр бүлийн хоёр ахмадын нэг нь нас нөгцвөл үлдсэн нь талийгаачийн тэтгэврийнх нь тодорхой хувийг авах юм.  Тэтгэврийн хэдэн хувийг олгох вэ гэдгийг хэд дэх гэрлэлт, хамтдаа хэдэн жил амьдарсан зэргийг харгалзан тухайн үеийн Засгийн газар тогтоох юм байна.

Өнөөдрийн байдлаар манай улсын 412 мянган иргэн өндөр насны тэтгэвэр авдгаас 220 мянга нь бүрэн тэтгэвэрт хамрагддаг бол эдгээрийн 76 мянган хүн нь ганцаар үлдсэн, хамтын тэтгэвэрт хамрагдах урьдчилсан тооцоо байгаа аж. Үүнээс үүдээд жилд 21 тэрбум төгрөг шаардлагатай гэсэн тооцоо байгаа юм.

Хуулийн төслийг анхнаас нь эсэргүүцэн чуулганы хуралдаанаас завсарлага авч хүртэл байсан УИХ дахь МАН-ын бүлгийн гишүүд “Жилээс жилд нийгмийн даатгалын сан хүндэрч байгаа. Энэ хүндрэлийг ханатай тооцож чадаагүй байвал хууль хэрэгжих боломжгүйд хүрэх эрсдэлтэй шүү” гэсэн юм.

Хамтын тэтгэврийн тухай хууль  2017 оноос эхлэн хэрэгжинэ.